Sámi artistta Ágy, Ráissas eret lea nammaduvvon dán jagaš «Urørt» loahppagilvui. Ieš lea nu duhtavaš ahte ii gávnna sániid.
Sámi artistta Ágy, Ráissas eret lea nammaduvvon dán jagaš «Urørt» loahppagilvui. Ieš lea nu duhtavaš ahte ii gávnna sániid.
– Lei hui stuora gudni go válljejuvvon diibmá «dan vahkku urørt» artistan, ja go dál vel lean nammaduvvon dán jagaš Urørt artistan lea juo vuoitun munnje, lohká Ágy.
Logi finalistta
«Urørt» lea neahttabáikki ja radioprográmma NRK P3 kanálas, gosa diktet ođđa musihkkaartisttaid nuvttá bidjat iežaset musihka. Juohke vahkku válljejit sii dan vahkku urørt, ja diimmáš 33 artistas geat ledje dán vahkku Urørt, leat 10 nammaduvvon loahppagilvui 2016.
Buorre doaivva
Urørt loahppagilvu lea njukčamánu 5. beaivvi ja dál galget 10 artistta gilvalit beassat loahppagilvui, gos lea sadji golmma artistii. Guovvamánu 11. beaivvi
galgá Ágy álggos oassefinálas deaivvadit «Whales & This Lake» joavkkuin.
– Jáhkán mus leat oalle buorit vejolašvuođat dán gilvvus go lean ožžon máhcahemiid ahte mus lea sierralágan ja autenttalaš musihkka mas leat sámi elemeanttat ja lea innovatiiva jietnagovva. Nu ahte in áiggo jur heaitit musihkain, bohkasa son.
Dál juo jienastit
Lea fágajury ja guldaleaddjit geat jienasteami bokte válljejit vuoitti guhte oažžu ruhttávuoittu, biddjo NRK P3 speallanlistui ja beassá čuojahit máŋga Norgga stuorámus feastiválain. Jienastit sáhttá P3.no bokte, dahje geavahit fáddágilkora #urørt (ja artistanama) Twitteris, Facebookas dahje Instagramas. Juohke háve go fáddágilkor geavahuvvo, de lohko dat jietnan.
– Gilvvus sáhttá dál juo jienastit, ja mun sávan buohkat geat liikojit mu musihka leat mielde jienasteame, vai mii ovttas beassat geahččalit duohpat dán vuoittu, lohká son.
Váldon bures vuostái
Ágy lea musihka čuojahan logi jagi juo, muhto ii leat ovdal manna čavčča almmuhan iežas musihka. Son muitala su musihkka lea váldon hui bures vuostái, erenoamážit iežas ruovttuguovllus.
– Lea váldon vuostái ollu buorebut go ledjen duosttan jáhkkit, erenoamážit Davvi-Norggas. Dat mearkkaša hui ollu munnje ja orro nu ahte lean juoidá dahkan riekta, lohká son.