Álggos leat golbma gažaldaga, jus daid máhtát, de manat viidáseappot gilvvus.
Álggos leat golbma gažaldaga, jus daid máhtát, de manat viidáseappot gilvvus.
Namma: Lemet Ánde Stueng
Ahki: 23
Guovlu: Kárášjohka
Bargu: Queering Sámi organisašuvdnamiellahttu
1. Sullii man olu olbmo orrot Unjárgga gielddas? (2014 lohku) 900, 930 vai 985?
- Oi … Ná … In dieđe, vaikko lean gal leamaš Unjárggas okte. Leat go son 985? BOASTUT.
Rievttes vástádus: 930.
2. Mii lea čulggon? Čuoldinávnnas, oassi gápmagis vai náhkkeoassi šávkkás?
- Čulggon? Na vuoi. Dakkár čuoldinávnnas? BOASTUT.
Rievttes vástádus: Oassi gápmagis.
- In dien gal sáhttán diehtit. In leat 70-jahkásaš, boagusta Stueng.
3. Maid barggat go simpput?
- De don njuikkut. Dego njoammil. RIEKTA
Go Lemet Ánde ii vástidan riekta buot golbma vuosttaš gažaldaga, de son ii beassan viidásit dán gilvvus. Son dattetge beassá geahččalit vástidit árvalusa mainna sáhttá fásket 5, 10 dahje 15 čuoggá. Dát lea dan duohken makkár ivnni vállje. Rukses ivdni lea váddáseamos, ja jus dan vástida riekta, de oažžu 15 čuoggá, alit árvalusas oažžu 10 čuoggá, ja ruonás ges 5 čuoggá.
Lemet Ánde vállje rukses ivnni, ja mii jearrat sus dán árvalusa:
Lea aitto ceggejuvvon ođđa kánturvisti mas lea 100 kantuvrra. Lásse lea ožžon bargun málet nummariid buot kantuvrra uvssaide. Galle geardde šaddá Lásse málet ovcceš-logu?
– Hmmm … Na 20 geardde, vástida son. RIEKTA
Galle čuoggá oktiibuot: 16 čuoggá
- Lei go die dat váddáseamos árvalus? Yes! In máhttán gal guokte vuosttaš gažaldaga, muhto mun gal lean álo duhtavaš iežan olahusain. Ii olmmoš sáhte leat buoret go maid ieš lea, in ge láve goasse iežainan gilvvohallat. Mus lei gal galgat áhkku veahkkin, son livččii diehtán mii čulggon lea.
Juohke gilvaleaddji beassá hástalit ođđa gilvaleaddji Ávvira geassegilvui.
- Mun hástalan Silje Muotka searvat dán gilvui, lohká Stueng.
Go Lemet Ánde Stueng čokkii 16 čuoggá de lea son dál njunnošis Ávvira geassegilvvus.
