-Almmuhus-
OĐĐASATLeamaš gávcci jagi sátnejođiheaddjin - joatká ain

Leamaš gávcci jagi sátnejođiheaddjin – joatká ain

-

-

Bargiidbellodaga Knut Inge Store joatká ain sátnejođiheaddjin Unjárgga gielddastivrras. Dal sii ovttasbarget guvttiin eará bellodagain, vai ožžot eanetlogu.

Dál lea čielggas makkár eanetlohku stivre  Unjárgga gieldda boahtte áigodaga 2019-2023. 

Dat leat golbma bellodaga mat galget stivret Unjárgga gieldda.

Bargiidbellodat, Sosialisttalaš gurutbellodat  ja Doarespolitihkalaš listu leat šiehtadallan ja ovttasbarget boahtte áigodaga. Dat čielggai mannan bearjadaga.   

–Mis leat leamaš buori ságastallamat ja šiehtadallamat, ja dal mii leat gávdnan čovdosa ovttasbargui, dadjá Unjárgga sátnejođiheaddji Knut Inge Store. 

 

Joatká sátnejođiheaddjin 

Bargiidbellodaga Knut Inge Store joatká nu maid sátnejođiheaddjin Unjárggas. Dat šaddá goalmmát áigodat go son lea sátnejođiheaddjin Unjárggas.  

–Mii Bargiidbellodagas čađaheimmet buori válggaid Unjárggas  ja mun illudan joatkit sátnejođiheaddjin ja ovddidit  Unjárgga, dadjá son.  

Hanne Iversen Noste Bargiidbellodagas šaddá várresátnejođiheaddji maŋŋel go posišuvnnat leat juhkkojuvvon.  

–Dat ii leat vel geavvan mu áigodagas ahte sihke sátnejođiheaddji ja várresátnejođiheaddji leaba goappašagat Bargiidbellodagas, dadjá Knut Inge Store 

 

Guokte áirasa vel 

Go Bargiidbellodat oaččui 45 proseantta jienasteddjiin, ja nu maid bisuhedje sin čieža áirasa,  dagaha ahte sii eai dárbbaš go guokte áirasa vel ovdal ožžot eanetlogu Unjárgga gielddas.

Nu Bargiidbellodat lea šiehtadan ovttasbarget  Sosialisttalaš Gurutbellodagain ja sin gielddastivrraáirasiin Sissel Røstgaard ja Doarespolitihkaš listtuin Marit Kjerstaden.

Dat golbma bellodaga ožžot eanetlogu Unjárgga gielddastivrras, gos oktiibuot leat 15 áirasa. 

Guovddášbellodagas leat golbma áirasa, guovttis leaba Sámeálbmogabellodagas ja okta áirras lea Olgešbellodagas.

 

Ovttasbargu 

Unjárgga Bargiidbellodat ovttas Sosialisttalaš gurutbellodagain ja Doarespolitihkalaš listtuin leat maid šiehttan ahte juohke bellodat bargagoahtá iežaset válgagiččuin suohkanstivrras.

Sii sávvet maid buori ovttasbarggu  boahttevaš áigodagas, nu čállet preassadieđáhusas.

 

Politihkalaš barggut  

Dat golbma bellodaga leat maid gávnnahan oktasaš politihka maid sii áigot ovddidit dán áigodagas. 

Sii sávvet eastadit buohccidieđihemiid ja buoridit HMS fálaldagaid suohkanis.

Sii háliidit maid buoridit mánáid ja nuoraid dili suohkanis, go sii evttohit dorvvolaš skuvlaluotta.

Bellodagat áigot maid guorahallat Sosialisttalaš gurutbellodaga evttohusa, jus lea vejolaš fállat nuvttá biepmu skuvllas.

Bellodagat sávvet  maid buoridit fiber-interneahtta fierpmádaga buot ássiide suohkanis. 

-Almmuhus-