Thon Hotealla Guovdageainnus leat heaitán atnimis gáktelágan biktasa bargobivttasin. Dás maŋás galget sin bargit gárvodit seamma ládje go muđui eará Thon hoteallat Norggas.
Thon hoteallas Guovdageainnus leat leamašan bargiin gáktesullasaš bargobiktasat, muhto dál lea Thon-joavku mearridan ahte eai galgga šat dakkár biktasat bargiin. Dás duohko galget sii maid atnit dábálaš bargobiktasiid, mat juo muđui leat eará Thon hoteallain.
Bissehan ođđa gilvvu
Thon hoteallas leat ge juo máŋga jagi atnán gáktesullasaš biktasiid. Dalle lei bivttashábmengilvu man sámi duojár vuittii. Su biktasiid leat ge bargit atnán bargobivttasin, muhto eai šat dás duohko. Vuosttašvuostáiváldi Dine A. Fenger Lynge lei ge dalle mielde válljeme guhte bivttas galgá šaddat bargobivttasin, go son lei dalle jurylahttu. Mannan čavčča álggahii vuot Thon hotealla bivttashábmengilvvu, muhto dan leat dál bissehan, eai ge galgga šat dakkár biktasat Guovdageainnu hotealla bargiin.
– Hui váivi
Fenger Lynge lohká dan hui váivin go eai šat galgga gáktesullasaš biktasa atnit Thon hoteallas Guovdageainnus.
– Mu mielas lea hui váivi ja vahát go leat hilgon dán biktasa, ja maid eai áiggo šat joatkit dan ođđa gilvvu mas galggai bargobiktasiid ođđa hápmi válljejuvvot. Erenoamážit lea váivi go mun ledjen ieš mielde dalle vihtta jagi áigi válljeme bargobiktasa man mii leat atnán dan rájes, muitala son, ja lohká gussiid gaskkas hui olu rámi ožžon daid biktasiid dihte.
Vahát
Guovdageainnu sátnejođiheaddji Johan Vasara mielas lea vahát go eai galgga šat atnit gáktesullasaš biktasiid.
– Jáhkán masset veahá erenoamášvuođa mii sis lei Guovdageainnu hoteallas, go eai šat áiggo atnit dákkár biktasiid, lohká son.
– Livččii maid lokten ja nannen sámi bivttashábmejeaddji árvvu gii beassá goarrut biktasiid sidjiide, muhto lea dieđus sin iežaset mearrádus, lohká Vasara.
Diehtu njunnošis
Guovdageainnu Thon hotealla hoavdda Knut Vidar Alseth mielas maid lea vahát, go su mielas lei okta dain mii buvttii erenoamášvuođa su hotellii. Son muitala iežas viggan ákkastallat manin galggaše bisuhit dákkár bivttashámi, ja maid ávžžuhit ahte sii berrejit beassat ain joatkit atnimis dáid biktasiid.
– Diehtu bođii njunnošis ahte eat galgga šat atnit dákkár biktasiid, ja dainna ii lean mihkke šat dahkat, muitala son.
Alseth ii loga iežas dieđuid mielde biktasiid hatti dagahan ahte Thon njunnošat eai šat áiggo joatkit atnimis dáid biktasiid, ja maid heaittihit ođđa bivttashábmengilvvu.
– Mu dieđu mielde ii leat dat leamašan ágga. Mus ii leat vástádus manin sii leat mearridan heaittihit dan ođđa gilvvu, ja váldit atnui dábálaš Thon hotealla bivttashámi Guovdageainnus maid, muitala Alseth.
– Lea go divrras atnit dakkár biktasa bargobivttasin?
– In áiggo kommenteret hattiid. Mii dušše doahttalit njunnoša mearrádusa, ja mu bealis leat geargan dainna áššiin, lohká son vel loahpas.
– Ledjen gárven ođđa biktasa Thonii
Bivttashábmejeaddji Sara Ellen Anne Buljo Eira lei gii hábmii Thon hotellii gáktesullasaš biktasa man leat atnán bargobivttasin máŋga jagi juo.
Buljo Eira lohká sutnje leamaš stuora gudni go Thon hoteallas Guovdageainnus leat atnán su hábmejuvvon biktasa bargobivttasin. Son maid mieđiha ahte lea váikkuhan olu su fitnodahkii ekonomalaččat beassat goarrut biktasa Thon hotellii.
– Dat lea váikkuhan ekonomalaččat munnje olu, sihke go lean beassan vuovdit dohko daid biktasiid, muhto maid go lean daid biktasiid bokte olu fuomášumi ožžon, lohká son.
Priváhtagovva
Eambbo diŋgojumit
Buljo Eira muitala ahte maŋŋel go vuittii bivttashábmengilvvu ja beasai goarrugoahtit Thon hotellii biktasiid, de lea dat dagahan ahte son lea oažžugoahtán eambbo diŋgojumiid eará fitnodagain ja olbmuin.
– Munnje lea váikkuhan hui olu Thon bivttas ekonomalaččat, ja ledjen maid hábmen juo gárvvisin biktasa ja áigon sáddet dan gilvui. Dál ii šatta dat ja dat lea hui vahát, lohká son.
Sara Ellen Anne Buljo Eira maid ii hálit hattiid birra hupmat, go dat lea fitnodatčiegusvuohta.
– Sáhtán dušše dadjat ahte sámi duodji ii leat hálbi, ja biktasa árvu lei roahkka dat maid mávssii, muitala son vel loahpas.
Ávvirii ii lihkostuvvan oažžut kommentára Olav Thonas ovdal go aviisa deaddiluvvui.
(Ášši lea deaddiluvvon báberaviissas 9.6.16)
