Ávanuori ássi Aslak Henrik Lango lohká stuorra uđđasa fierran hui lahka viesuid.
Odne eahkes fierai geađgeuđas Ávanuoris, Muosát suohkanis, Oarje-Finnmárkkus.
Uđas lea fierran rastá fylkkaluotta 889, nu ahte Ávanuorrái lea luodda gitta.
Dat stuorra geađgeuđas lea fierran hui lahka Ávanuori márkana.
– Issoras oaidnit
Aslak Henrik Lango gii orru báikkis muitala ahte uđas lea fierra dušše moadde čuođi mehtera eret su dálus.
– Mun in dieđe man alla ja govdat lea uđas, muhto dat lea hirbmat stuoris. Lea issoras oaidnit makkár fámut leat leamaš jođus, muitala Lango.
Lei iFinnmark neahttaaviisa mii ovddemuš dieđihii uđđasa birra.
(Ášši joatká gova vuolábealde)
Govva: Aslak Henrik Lango
Evakuerehan
Ávanuoris leat guovtti dálus mat leat lahka uđđasa, evakuerehan olbmuid.
Politiijat eai leat ožžon dieđu ahte olbmot galget leat šattan uđđasii, muhto sii leat jođus báikái.
Dan botta leat suohkana buollinčaskadeaddjit ja gádjunveahka gidden uđđasa birra vai olbmot eai mana dohko.
Dál 21.00 áigge galget politiijat joavdán báikái.
– Ii oro mihkke čájeheame ahte olbmot leat gártan uđđasii, muhto mii leat dieđihan Norgga Gádjunbeatnagiidda ja Váldogádjunguovddážii jus sidjiide šaddá dárbu. Muhto ávžžuhat olbmuid dieđihit jus várohit eará, dadjá Finnmárkku politiijaguovllus Anders Oppdahl iFinnmark neahttaaviisii.
– Lávjit vázzit diekko
Aslak Henrik Lango ii duosta jurddašit ge mii livččii geavvan olbmuiguin jus dákkár uđđasa vuollái geavaše.
– Uđas lea fierran dakkár báikkis gokko lávejit olbmot dávjá vázzit. Ama juo ii leat okta leamaš dalle vázzime go várri fierai vulos, dadjá Lango.
Politiijat bealis dieđihit ahte dan rájes go sii jovdet báikái, de lea sin ovddasvástádus váldit vára olbmuid sihkkarvuođas.
Aslak Henrik Lango ii leat vuos ožžon makkár ge dieđuid, muhto diehtá ahte suohkan njunnošat lea hoahppočoahkkimis.
– In leat vuos gullán maide, muhto gal dás ferte dušše vuordit ja gullát, dadjá son loahpas.
