Guovdageinnu Lagasradio Nils Martin Kristensen šálloša go sis ii šatta bearjadatsátta go olles bargoveahka lea buohccindieđihuvvon.
Guovdageainnu Lagasradios leat njeallje bargi ja sii leat buohkat buohccán oktanaga.
– Lea hui ártet go mii leat buohkat buohccán oktanaga. Muhtin bargit mis leat buohcan beassážiid rájes. Mii njealjis leat buohcan, muhto mii leat nagodan bargat bingoin ja sáddagiin, muhto buohccindieđiheapmi váikkuha ahte odne, bearjadaga, ii šatta GLR rádios sátta, muitala son.
Influeansa njoammu
Kristensen čilge ahte lea garra influeansa golgodávda mii dál njoammu Guovdageinnus.
– Olu bargobáikkiin leat stuora oassi bargoveagas buohccindieđihuvvon. Lea nu issoras go lea influeansa-epidemiija dál maŋŋel beassážiid. Nu maiddái min bargosajis, ja dat váikkuha ahte eat nákce buvttadit otná sáddaga, čilge son.
Sáddejit sáddagiid
Nils Martin Kristensen deattuha ahte boahtte vahkku sáddagat sáddejuvvojit nu go dábálaččat. Lea dušše odne bearjadaga go ii šatta sátta.
– Boahtte vahkkuin lea min bargoveahka dearvvašnuvvan ja šaddet sáddagiid GLR rádios nu go dábálaččat, loahpaha son.
