-Almmuhus-
OĐĐASAT– Lea hoahppu ásahit ođđa stivrra 

– Lea hoahppu ásahit ođđa stivrra 

-

-

Sámediggeráđđi Henrik Olsen (NSR)  lohká dál kulturministara jođánit fertet vuođđudit ođđa stivrra Davvi-Norgga dáiddamuseii, go dál ii gávdno luohttámuš dasa. 

Kulturdepartemeanta áigu dál čohkket eanet aktevrraid oažžun dihte ollislaš gova Davvi-Norgga dáiddasuorggis ja ságastallat makkár rolla Davvi-Norgga dáiddamuseas galgá. 

Sámediggi lea maid bovdejuvvon dan čoahkkimii cuoŋománu 8.beaivvi. Sámediggeráđđi Henrik Olsen (Norgga Sámiid Riikasearvi) lea vuorrástuvvan diliin mii lea čuožžilan Davvi-Norgga dáiddamuseas diggeášši oktavuođas mas  ovddeš direktevra Jeremie McGowan lei dikkis musea vuostá. 

– Min mielas lea hoahppu oažžut ođđa stivrra stivrra masa dáiddáriin ja dáiddabirrasis lea luohttámuš. Dál lea garra eahpeluohttámuš stivrra ja dáiddabirrasiid gaskka, stivrra ja bargiid gaskka, ja stivrra ja fylkkadikkiid ja sámedikkiid gaskka. Sámedikki bealis mii sávvat cuoŋománu 8. beaivvi álgá jođánis proseassa addit stivranammadeami barggu  Sámediggái, fylkkagielddaide davvin ja Davvi-Norgga dáiddárorganisašuvnnaide, dadjá Olsen. 

Son lohká dán ovddasvástádusa gullat kulturministarii.  Olsen maid čállá preassadieđáhusas ahte sámi dáidda loktejuvvui dan áiggis go McGowan jođihii musea. 

– Musea fátmmastii sámi dáidaga iežaset prográmmaide, mii ii leat ovdal dáhpáhuvvan dáiddamusea historjjás. Son fuomášuhtii maid dan ahte váilot sámi institušuvnnat mat áimmahuššet sámi dáidaga, ja vuittii našunála bálkkašumiid DNDM namas dan barggu ovddas, čállá Olsen .

Loga maid:
Okta nubbi geassáda musea stivrras

Hoahpuha Sámi dáiddamusea ásaheami

Olsen maid čállá dan oktavuođas ahte Sámi dáiddamusea ásaheapmi lea earenoamáš dehálaš dál. Stuoradiggedieđáhus museaid birra, St. 23 (2020-2021 Musea i samfunnet – Tillit, ting og tid), mii almmuhuvvui njukčamánu 26. beaivvi, namuhuvvo ahte Sámi dáiddamusea lea vuoruhuvvon. Bargu lea čadnon RiddoDuottarMuseii Kárášjohkii.

Sámediggi lea álggahan guorahallama 2019, ja Kulturdepartemeanta lea joatkán prošeavttain ja addán dan prošeaktan Statsbyggii.

– Kulturministtar ferte vuoruhit Sámi dáiddamusea ásaheami bajimussii dás ovddosguvlui. Davvi-Norgga dáiddamusea dilli čájeha dađi bahábut man kontroversiella sámi dáidda sáhttá leat dáčča institušuvnnain. Ii leat šat dohkálaš ahte sámi dáidda ná galgá hálddašuvvot, ja dás ovddosguvlui ferte Norgga Stuoradiggi ja Ráđđehus láhčit dili vai nanu sámi institušuvnnat, nu go Sámi dáiddamusea, áimmahuššet sámi dáidagiid ja kultuvrra, dadjá sámediggeráđđi Henrik Olsen. 

-Almmuhus-