-Almmuhus-
KULTUVRA– Lea helvet go leat gieđat muhto ii leat gean sallu

– Lea helvet go leat gieđat muhto ii leat gean sallu

-

-

Nu dat ledje Festspillene i Nord-Norge riemut gohčodan erenoamáš konseartta gos SlinCraze ja Ovllá maid čuojaheigga.

Konseartta namma boahtá das go gávdnojit nuorra artisttat geat háliidivčče olahit máilbmái, muhto dárbbašit vejolašvuođa beassat čájehit maid máhttet.

Ikte lágidii Festspillene i Nord-Norge dán erenoamáš dáhpáhusa Harstas, gos 20 nuorra artistta geat bohtet miehtá Davvi-Norgga, čuojahedje moatti lávddis vuorrolága.

Maiddái sámeartistta guoktá SlinCraze dahje Nils Rune Utsi ja Ovllá dahje Ole Hætta, searvvaiga dása.

– Moai ledne hui duhtavaččat go ledne beassan boahtit Harstai. Ean lean doivon ahte ná ollu geahččit bohtet, dajaiga soai maŋŋil konseartta.

 

Bihkka seavdnjat

Konsearta lágiduvvui Nordic Hall nammasaš konseartaviesus, gos lágideaddjit ledje rahkadan 4-5 smávva lávdi. Dát lei hui earenoamáš gehččiide, go besse hui lahka artisttaid. Geahččit čužžo olles dan botta go konsearta bisti ja go ain okta joavku gearggai de šattai áibbas seavdnjat iige olmmoš de diehtán guđe lavdis de fas leat čuojaheaddjit.

Dan konsearttas ledje iešguđetlágan šáŋra, musihkkajoavkkut, dánsejeaddjit, felá čuojahedje ja guokte ráppára Mázes eret.

Go lei Ovlla ja SlinCraza vuorru de gal šattai oalle eallin konsearttalanjas, ollugat álge dánsut ja spežžo gieđaid.

– Lea vuosttaš geardde máilmmis ahte dakkár vugiin lágidit konseartta gos geahččit besset hui lahka artisttaid. Seamma joavkkus leat artistat moadde lávdde alde go čuojahit ja dánsot. Olles konsearttalatnja váldo atnui ja olbmot čužžot birra lávddiid ja sáhttet vaikko dollestit artisttaid, muitalii buvttadeaddji Sigurd Heide.

 

Čállán ja govven: Mikkel-Per Sara

-Almmuhus-