– Lea deaŧalaš ahte sámit dál ožžot láhkanannejuvvon guolástusrievtti birgejumiset dihtii, dadjá sámediggeráđđi Silje Karine Muotka (NSR).
Stuorradikki Bearráigeahččan- ja konstitušuvdnakomitea doalai duorastaga golggotmánu 8. beaivve gulaskuddama riddo- ja áhpebivddu bivdoearrevuogádaga birra maid Rikarevišuvdna lea iskan. Sámediggi searvvai gulaskuddamii, dieđihit sii preassadieđáhusa bokte.
– Vealtameahttun deaŧalaš lea sihkkarastit mearrasámiid boahtteáiggi, dan bokte ahte stuorát oassi guolleresurssain (bivdoeriin) addojuvvojit fatnasiidda mat bivdet ja buktet varas sállaša vuostáiváldiide rittus ja vuonain, dadjá sámediggeráđđi Silje Karine Muotka (NSR).
Čuovvulit lasseiskkademiin
Sámediggeáirras Ronny Wilhelmsen (Bb) deattuha ahte Riikarevišuvdna ferte čuovvulit iskkadeami lasseiskkademiin sámiid guolástusrievtti birra. Son čujuhii bearráigeahččan- ja konstitušuvdnalávdegoddái ahte politihkalaččat lea ovddasvástádus fuolahit ahte bivdoearit juogaduvvojit rievttalaš vuogi mielde, ja ahte sihkkarastojuvvo ássan miehtá rittu.
– Iskkadeamis ferte čuvgejuvvot movt mearrasámiid bivdoriekti, oassin min kulturbarggus ja min historjjálaš bivddu vuođul, galgá láhkanannejuvvot ja addit sihkarvuođa bivdoeriid oažžumis ja sullasaččain gozihan dihtii sámi kultuvrra ávnnaslaš vuođu, dadjá Wilhelmsen.
Hui fuolas
Sámediggeáirras Sandra Andersen Eira (NSR) čilgii lávdegoddái man ollu kapitála dasa dárbbašuvvo, dálá bivdoearrehattiiguin. Maiddái háhkat sihkkaris fatnasa mas lea dohkálaš standárda, ja ahte dat lea mearrideaddji oassi vuođus mii dárbbašuvvo jos galgá sáhttit oažžut birgejumi guolástusas.
– Mii leat hui fuolas guolástusaide rekrutterema ektui, dadjá Andersen Eira (NSR).
Negatiivvalaš ja hui duođalaš váikkuhusat
Sámediggeráđđi Muotka čujuhii ahte Sámediggi lea váldán ovdan dan go bivdofatnasiid eaiggádat geahppánit ja guolástuslobit addojuvvojit dađistaga vánit gieđaide, ja ahte departemeanta ja guovddáš eiseválddit eai leat čuvvon čielggadusgohččosa. Nu eai leat ge regulerenrievdadusat mat leat dahkkojuvvon dađistaga čielggaduvvon dahje politihkalaččat árvvoštallojuvvon. Dan geažil leat olbmot fárren eret, ja rittu álbmot lea báhcán dušše geahččat go stuorra fatnasat rábádit buot dietnasa ja guolleresurssaid dađistaga eanet ja eanet. Šaddá dađistaga čielgaseabbon man deaŧalaš lea ahte sámit dál ožžot láhkanannejuvvon guolástusrievtti birgejumiset dihtii.
– Lea hui duođalaš dat maid Riikarevišuvdna lea buktán albmosii ahte rievdadusaid submi bivdoearrevuogádagas lea buktán negatiivvalaš ja hui duođalaš váikkuhusaid guolástusdoibmii ollu riddoservodagain, dadjá sámediggeráđđi Silje Karine Muotka (NSR).
