-Almmuhus-
-Almmuhus-
OĐĐASAT– Lea dárbu lasihit sáme­vaši- ja vealahan­eastadeami Bådådjo šiehta­dussii

– Lea dárbu lasihit sáme­vaši- ja vealahan­eastadeami Bådådjo šiehta­dussii

-

-

Sámediggepresideanta Silje Karine Muotka lohká dárbbu heivehit Bådådjo ovttasbargošiehtadussii miessemánu 17. beaivvi dáhpáhusaid geažil. 

Sámediggepresideanta Silje Karine Muotka (NSR) lohká su mielas lea maid hui váivi gullat dan dáhpáhusa birra, go su mielas ii leat veháge dohkálaš ahte smávva lunta vásiha dakkáriid go galgá ávvudit Vuođđolágabeaivvi. Son rámida duostilis váhnema gii lea ovddidan ášši viidát dáid beivviid.

– Su eadni lea hui duostil go muitala rahpasit dan birra ja mun jáhkán dađi bahábut leat oallugat vásihan áiggiid čađa seammalágán fearániid. Muhto lea buorre go mis dán áigge lea eambbo olmmošárvu ja iešdovdu, ja mii diehtit ahte dat mii ii leat dohkálaš, dan ferte maid čalmmustahttit, dadjá Muotka. 

Loga maid:
– Boahtte jagi galgá sámi leavga vel eambbo oidnosii Bådådjos

Ođastit ovttasbargošiehtadusa

Sámediggepresideanta lohká ahte álo čuožžila juogalágán vuosteháhku go soames muitala diekkár vásáhusaid birra ja álget hoahkat loavkašuhttin liiggástallamiid, muhto son lohká goitge dárbun ságastallat manne nu olu dakkár eaŋkil vásáhusat dáhpáhuvvet. Son lohká dan leat juogalágán stukturealla dáhpin mn ferte eastadit go hábme politihka ovddosguvlui. 

Sámedikkis lea ge leamaš ovttasbargošiehtadus Bådådjo gávpogiin borgemánu 2015 rájes, ja leat čoahkkinastán guovtte gearddi jagis. Dasa ii leat namuhuvvon vealaheapmi. 

– Diet ahte eastadit sámevaši, vuostehágu, vealaheami ja veahkaválddi ja illasteami, lea vejolaš lasihit dohko go mii deaivvadit juohke jahkebeali ja árvvoštallat šiehtadusa ja makkár doaimmaid mii galgat vuoruhit. Dat lea sihke politihkalaš ja hálddahuslaš dásis. Šiehtadus dahká vejolažžan hutkat konkrehta doaimmaid ja lagabuidda gulahallat juste daid áššiid birra.

Čuovvolit Romssa ovdamearkka

Sámedikkis lea sierra doaibmaplána sámevaši vuostá man dievasčoahkkin gieđahallá geassemánus. Doaibmaplánas lea 17 doaimma dahje áŋgiruššansuorggi maiguin Sámediggi bargá jagi 2025 vuostá.  

Loga maid:
Áigot nannet ovttas­barggu bolesii­guin ja ávžžu­hit Stáhta­advokáhta guora­hallat bolesa barggu 

– Dát doaibmaplána leamaš hui badjin min vuoruhanlisttus go leat ožžon dan beavdde nala oalle johtilit, ja olu das lea oaivvilduvvon skuvlii. Muhto dien fearánis mii dál lei Bådådjos, leat ollesolbmot láhtten unohasat máná vuostá dál, ja sin han ii fidne skuvllaide. Romssas mis lea leamaš dat Doarvái dál-kampánja mas leat bidjan doaimmaid ja nu leat beassan digaštallat movt sámevašši čuohcá servodahkii dego buozalmasvuohta. Dat lea sielu buozalmasvuohta, sihke daidda geat vasihit sámevaši ja daidda geat ovddidit dan vaši. 

Silje (5) vásihii seamma

Silje Karine Muotka muitá go son ieš lei viđajahkásaš ávvudeame miessemánu 17. beaivvi, go duođas fuomášii ahte son lea jur sápmelaš. Lei áidna gávttehas Girkonjárggas ja lei juste maŋŋel Álttástuimmiid. 

– Muittán buohkat gehčče munnje. Eai dat orron beare siivut, in ge mun riekta ipmirdan manne. Muhto de muhtin lunttat čurvo «gea, do lea sááápmelaš». Dalle mun fuomášin ahte sápmelaš han lea juoga erenoamáš. Ja de veaigin go lágidedje stohkosiid, mun vuiten buđetviehkama. Ledjen falit vel go dat lunta mii čuorvvui beaivet. Dien gal muittán oba bures, muitala son. 

– Ávvut fal oidnosis, gávttiin ja sámi leavggain

Eadneolmmoš, gean mánná vásihii unohisvuođaid Bådådjos miessemánu 17. beaivvi ráiddus, muitala Ávvirii ahte sutnje leat olu olbmot miehtá riikka muitalan seammasullasaš vásáhusaid birra. Sámediggepresideanta Silje Karine Muotka háliida dadjat ahte sis lea nanu doarjja ja son die

– Mun dieđán dat lea hui váivi, muhto galgabehtet muitit mii leat hui oallugat geat dorjot du. Mun lean hui giitevaš go muitala rahpasit dan birra, ja mii fertet roahkkadit ain čiŋadit gávttiin ja čájehit mii ávvudit Vuođđolágabeaivvi, go dat gullá midjiide maiddái. Galgat buriin mielain ávvudit Vuođđolága mas čuožžu ahte stáhta eiseválddiin lea ovddasvástádus sápmelaččaid dáfus, ja sámi leavga ii leat boastut dan beaivvi, dadjá Muotka. 

Bådådjå sátnejođiheaddji Ida Pinnerød ii leat gaskavahku ii ge duorastaga astan addit Ávviriii jearahallama áššis. 

-Almmuhus-