-Almmuhus-
-Almmuhus-
Beassážat 2022Lávvu ii dievvan vaikko čeahpes nuorra juoigit lávkejedje lávdái

Lávvu ii dievvan vaikko čeahpes nuorra juoigit lávkejedje lávdái

-

-

Árbevirolaš juoigankonsearta lea boarráseamos lágideapmi ođđaáigásaš beassášfestiválas maŋŋel go Áillohaš loktii luođi almmolašvuhtii áiggis goas luohti ja juoigan lei dego suddu almmolašvuođas ja gulai eambbo priváhta oassái beassážiin ja suohtastallamis. Dábálaččat čohkke árbevirolaš juoigankonsearta ollu olbmuid, vaikko dán jagi gal livččii ain buorre sadji leamaš eambbo gehččiide lávvulávddis, Gilišiljus. 

Ovdal leat dábálaččat leamaš boarrásit ja hárjánan juoigit lávddi nalde go dát konsearta lágiduvvo. Dán jagi lei lágideaddji rievdadan dan ja válljen nuorra profiilla. Dán jagi juige nuorra juoigantaleanttat geat dáide leat apmásat ollu gehččiide. Lágideddjiid bealis soittii dat buorre vuohki oččodit ođđa nuorra juigiid juoigat árbevirolaš luđiid. 

Máŋggabealálaš

Geahččit besse vásihit máŋggabealálaš konseartta masa serve juoigit eará guovlluin Sámis. Golbma báikkálaš juoigi geat leat bajásšaddan luđiin ledje mielde. Saara Hermansson, gii orru Johkamohkis, lei okta juigiin. Son dáidá leat dovdoseamos gehččiide go lea čeahpes lávlu gii vuittii Sámi Grand Prix 2019:s. Juoiganlávddis son čájehii ahte máhttá juoigat maid. Son juoiggai melodialaš stiillain ja čielga čáppa jienain masa oallugat orro liikome. 

Astrid Tuorda, gii lea eret Randijávrris, lei mielde Sámi Grand Prix-cover prošeavttas 2019:s, muhto ii dáidde nu dovddus min guovllu olbmuide. Son juoiggai maid seamma málliin go Hermansson ja sus maid lea čáppa jietna. 

Báikkálaš juoigit

Piera Eira lea šaddan dovddus juoigin min guovllus. Son juoiggada stargadit iežas hirbmat buriin juoiganjienain. Eatnasat leat gullan Máze-bártni juoigame «Gáren-Ánná» ja juoigá maid eará luđiid ražakeahttá ja vuohkkasit. 

Mathis Eira ii lean go čorpma stuoru go vuosttaš geardde lávkii lávddi nala, ja lea álo liikon juoigat. Son máhttá hirbmat ollu luđiid ja sáhttá rohttestit gehččiid luđiid geaid oaidná gehččiid searvvis, dahje go son fáhkka rohttestii Inga Juuso-rohki maŋŋel go oinnii su gova lávus. Son lea maid čeahppi ja oadjebas lávddi nalde. 

Sárá Gáren Ánne Nilut lea Inger Marie Niluha nieida, ja nu go ieš dajai, de lea gullan luođi dan rájes go lei unna nieiddaš. Dál son lea viimmat fuomášan ahte son ge háliida geahččalit juoigat almmolaččat. Juste dan ovddas gal sáhttit giitit su, ja eahpideames lei dá maŋemus geardde go su gulaimet juoigame almmolaččat. 

Vaikko miellaláhki ja konsearta lei buorre ja nuorra, čeahpes juoigit lávkejedje lávdái, de lei dát konsearta ánssášit eambbo gehččiid. Elle Sara Helene Sokki láidestii čehpet gehččiid konseartta čađa. 

-Almmuhus-