Go duojárat sihke Norgga, Ruoŧa- ja Suoma bealde čoahkkanit. Duodjemárkanat Guovdageainnus geasuhit nu ollu gávppašeddjiid ja olbmuid, ahte ii leat buohkaide sadji. Vuordinlisttus leat ain duojárat.
Juohke skápma lágiduvvojit duodjemárkanat Báktehárjjis, Guovdageainnus. Duodjemárkanat geasuhit nu olu olbmuid ahte stuora Báktehárji, njulgestaga lea beare dievva.
Illá lea juolggi sadji ge.
Lassin lagabui čuođi duojárii geat leat juo ožžon vuovdinbeavdái saji, leat vel eambbosat vuordinlisttus – geaidda ii leat sadji.
Badjel 60 duojára servet
Guovdageainnu nuoraidskuvlla logát luohkká lágida márkaniid gosa vurdet 66 duojára. Luohká mediavástideaddji, Maia Hætta, lohká stuora beroštumi lágideapmái.
– Mis leat juo badjel 60 duojára geaidda leat várrejuvvon beavddit, ja vuordinlisttus leat maid duojárat geaidda ii leat vel sadji. Čájehuvvo ahte lea hirbmat stuora beroštupmi márkaniidda, ii mannan várra go mánnu dan rájes go almmuheimmet márkaniid dassážii go beavddit ledje dievvan, dadjá son.
Márkaniidda servet báikkálaš duojárat, muhto maiddái bohtet dobbelis olbmot maid, nu go Álttás, Kárášjogas, Suomas ja Ruoŧas. Dan 66 searvvis leat vel earát go dušše duojárat, earret eará silbačeahpit, fitnodagat ja earát.
Čáppa duojit ja njálgga gáhkut
Lassin duodjemárkaniidda vuvdet oahppit vel biđđosa, gáhkuid ja eará herskuid kafeas.
– Mii leat láibon dábálaš, glutenkeahtes ja laktosekeahtes gáhkuid vai galggašii fálaldat buohkaide min kafeas, muitala Maia Hætta.
Ávvir boahtá maid
Eai leat dušše duojárat ja eará vuovdit gávdnamis daid márkaniin, Ávvir boahtá maid.
Váldodoaimmaheaddji, Kari Lisbeth Hermansen, muitala manne Ávvir lea válljen oastit beavddi márkaniin.
– Mii háliidit leat oidnosis ja háliidit čájehit iežamet fálaldagaid go mii vásihit ahte oallugat min lohkkiin eai dieđe min fálaldagaid birra. Ovdamearkka dihte leat olu báberaviisadoallit geat eai leat váldán atnui digitálaaviissa sisabeassama, ja nu manahit fálaldagaid maid ovddas leat juo máksán. Nubbi fálaldat mii mis lea, lea digitálavuorká, gos gávdná buot Min Áiggi, Áššu ja Ávvira aviissaid. Mii háliidit min lohkkiid oahpahit ohcat ja geahččat boares aviissaid, seammás go beassat deaivvadit min lohkkiiguin, čilge son.
Njuolggosátta márkaniin
Márkaniid oktavuođas lea Ávviris njuolggosátta vel.
– Mii Ávviris leat mearridan ahte háliidit čájehit oasáža duodjemárkaniin njuolggosáddagis. Prográmmas finadit mis guossit ja guokte prográmmajođiheaddji jođiheaba sáddaga. Min mielas lea dehálaš vuoruhit maid dáhpáhusaid gos duodji lea guovddážis, muitala neahttadoaimmaheaddji Berit Marie Lise Eira.
Sátta álgá diibmu ovttas ja bistá birrasii 15 minuhta.
