Birasdirektoráhtta dieđiha ahte lavnnjis leat buorit iešvuođat gilvimii, muhto lavdnjegeavaheapmi čuohcá sihke luonddumáŋggabealatvuhtii ja dálkkádahkii.
– Eanaš norgalaččat sáhtášedje geavahišgoahtit buriid lavnnjehis molssaeavttuid, muhto šattogárdeealáhus ii sáhte nu álkit heaitit dan geavaheames. Dehálaš boahtteáigái lea ovdánahttit buriid lavnnjehis buktagiid, lohká Birasdirektoráhta direktevra, Ellen Hambro preassadieđáhusas.
Lea Dálkkádat- ja birasdepartemeanta mii lea bivdán Birasdirektoráhta iskat man vejolaš lea geavahišgoahtit lavnnjehis buktagiid šaddadaneatnamis ja eanabuoridanbuktagiin. Dál álget giđđabarggut, nu go čorgen, rahpun ja gilvit šattuid šattogárddiide ja viessoaskkiide. De lea dárbu eatnamii ja duktagii.
Rássegárdeguovddážiid ja buvddaid eanafálaldagas ii leat dušše eana, muhto maid lavdnji mii lea vižžon Norgga jekkiin. Norga lea čadnon EU dálkkádatrámmii man geatnegasvuohta lea ahte ii galgga luoitit 2030:i eambbo dálkkádatgássa go dan maid eana njammá.
Jus 2020-2025 áigodagas ii olat dán mihttomeari, de čavge ráđđehus gáibádusa.
