Beassášlávvordaga lea fas áigi Sámi stuora musihkkagilvui, Sámi Grand Prix (SGP). Sámi Grand Prixas gilvalit artisttat guovtti oasis, juoigamis ja lávlumis. Dás oainnát dán jagáš lávlunoasi gilvaleddjiid.
Nils Henrik Buljo, Guovdageaidnu
«1+1»
Šuokŋa/sánit: Nils Henrik Buljo
Nils Henrik Buljo» lea dovddus namma sámi teáhter- ja musihkkamáilmmis. SGP lávdde alde ii leat gilvalan dan rájes go 1996:s vuittii lávlunoasi lávlagiin «Go beaivváš badjána».
Govven: Kari Lisbeth Hermansen/vuorkágovva
John Arvid Johnskareng, Kárášjohka
«Luossagonagas»
Šuokŋa/sánit: John Arvid Johnskareng
Šáŋŋer: Country/countrypop
Lea goalmmát geardi go John Arvid searvá SGP:i, son lei mielde 1991:s ja 1992:s. Lávlla lea luossagonagasa birra ja dan lea čállán gudnejahttit áhčis gii lea fargga 80-jahkásaš ja áŋgiris luossabivdi.
Preassagovva
Kalle Urheim, Divttasvuotna
«Idjasuoivvan»
Šuokŋa/sánit: Kalle Edvard Urheim.
Heivehan/mielde joavkkus: Kalle Urheim ja Emil Bekkevold.
Divttasvuotnalaš Kalle Urheim lea sihke artista, komponista ja teakstačálli. Son ráhkada ođđaáigásaš lávlagiid maid vuođđun leat julevsámi luohte- ja lávllaárbevierut. Kalle lea leamašan mielde guosseartistan muhtun CD-skearruin ja almmuhii 2014:s EP «Ábe rastá». Son lea dál bargamin ođđa skearruin mii ilbmá dán jagi mielde. Kalle Urheim čilge ahte «Idjasuoivva» lea dat mii váivašuhttá olbmo, ija beaivvi. Dat gul roggá bajás mu ja du vigiid ja heajut beliid. Muhto, loahpas ráhkisvuohta vuoitá
– Mun in hálit dulkot maid dáinna lávlagiin háliidan muitalit. Buot olbmuid lea alddiineaset váibmu, siellu ja miella mii guldala.
Lávlagiin háliidan ovdanbuktit ráhkisvuođa, ilu ja doaivaga. Buot dulbmojuvvon ja cielahuvvon gávttehasaide, ja earenoamážiid min ráhkis ja divrras nuoraide miehtá Sámi eatnama, beroškeahttá makkár giela hupmet. Sidjiide guđet rahčet vigiiguin, morrašiin ja psykalaš váttuigui, čilge Urheim vel.
Preassagovva/govven govvejeaddji Kasia Mikolajewska
Háldi, Kárášjohka/Guovdageaidnu/Leavdnja
«Suoivvanasain»
Šuokŋa: Trond-Even (Treven) Kåven Kaaby ja Knut Eilif Bakkevold.
Sánit: Anne Gro Gaup ja Maia Hætta
Dán ođđa joavkkus leat mielde guovdageaidnulaš Anne Gro Gaup, kárášjohkalaš Trond-Even (Treven) Kåven Kaaby ja leavdnjalaš Knut Eilif Bakkevold. Lávlla lea dan birra ahte duostat amas geainnuid guorrat. Teakstačálli čilge ahte lávlla lea dan birra ahte suoivvanas lea oaidnemeahttun mii buktá rávvagiid ja oahpista rávvagiiguin eallima luottaid gávdnat.
Preassagovva
Anja Storelv, Råneå
«Liegga salla»
Šuokŋa/sánit: Bernt Mikkel Haglund (Sániid sámás: Isak Samuel Hætta)
Heivehan: Anja Storelv ja Hans Lennart Bruun
Šáŋŋer: Etno-pop
Artisttat Anja Storelv ja Hans Lennart Bruun (geassinčuojanas)
Lávlagiin čilgejit iežaset váldit mielde guldaleddjiid dollamáilbmái, gos beassá lebbet sojiid ja rámis girddášit.
Preassagovva
Rávggon, Vuohčču
«Máska»
Šuokŋa: Matti Naakka
Sánit: Milla Elmiina Pulska
Šáŋŋer: Folk-Rock
– Lávlla lea kritihkka «image-huksemii» ja dan birra maid olbmot bidjet sosiálamediaide. Gávpoteallimis leat dávjá olgguldas áššit dehálaččat. Lávlla lea dego vástádus dasa. Go máhccá fas Sápmái dahje ruoktot, de leat eará áššit go olgguldas áššit dehálaččat, čilge Milla Elmiina Pulska.
Preassagovva
