-Almmuhus-
KULTUVRALávlu Skábmagovaid mánáid- ja nuoraidbeaivvis

Lávlu Skábmagovaid mánáid- ja nuoraidbeaivvis

-

-

Skábmagovat filbmafestivála lágiduvvo dán mánu 22. – 26. beaivvi, Anáris. Dan oktavuođas lea mánáide- ja nuoraide sierra beaivi, gosa earret eará Emma Elliane Valkeapää boahtá lávlut.

Nu go dábálaččat, Skábmagovat filbmafestivála álggahuvvo mánáid- ja nuoraidbeivviin.

 

Ságastallan sámi filbmamáilmmi birra

Nuoraidbeaivvis lea ságastallan sámi filbmamáilmmi birra, dohko čohkke Sámemusea Siidii badjedásse- ja logátluohká ohppiid miehtá Sámi.

– Nuoraid várás lea ordnejuvvon panelaságastallan sámi filbmamáilmmi birra, masa oassálastá earet eará filbmadahkki Suvi West, čállá filbmafestivála preassadieđáhusastis.

Dan lassin ságastallamiin leat Sámi oahpahusguovddáža rektor Liisa Holmberg ja Sámedikki kulturlávdegotti sátnejođiheaddji Ásllat Holmberg maid doppe.

Loahppabeaivvi boahtá ođđa musihkanásti, Emma Elliane, lávlut.

 

Besset oaidnit mánáid filmmaid

Mánáidbeaivvis mánáidgárde- ja vuolleskuvlaoahppit besset oaidnit sidjiide heivvolaš sámi ja eamiálbmot filmmaid.

– Sidjiide leat bargobájit, main mánát besset oahpásmuvvat animašuvnnaide ja máidnasiidda sihke improvisašuvnna ja filbmamáilbmái, čállá festivála.

Bargobájiid dollet earet eará animáhtor Jouni West, neavttár Irene Länsman ja Mánnu mánáid kulturguovddážis Petra Magga-Vars.

Doppe besset gullat livemusihka, go Ima da Tiina Päärna ja Ima já Heli Párnááh loaiddastit mánáidbeaivvi loahpas.

Mánáidbeaivi lágiduvvo Sajos sámekulturguovddážis.

-Almmuhus-