Nuorra Kárášjoga nieida lea olihan viidát dan oanehis áiggis go lea bargan artistan. Bearjadaga almmuhii ođđa lávlaga gildojuvvon ráhkisvuođa birra.
Nuorra Kárášjoga nieida lea olihan viidát dan oanehis áiggis go lea bargan artistan. Bearjadaga almmuhii ođđa lávlaga gildojuvvon ráhkisvuođa birra.
19-jahkásaš Aili Kathrine Wergeland Teigmo lea ráhkadan ođđa lávlaga man almmuhii mannan bearjadaga.
– Son lea ieš ráhkadan iežas vuosttaš lávlaga, ja son lávlu gildojuvvon ráhkisvuođa birra, muitala Aili manager, Viktoria Eriksen, preassadieđáhusas.
Lávlaga lea spánskalaš Tommy Cadance buvttadan, ja Daniel Olguin lea miksen ja mastren lávlaga.
Earáid ráhkaduvvon lávlagiin beaggigođii
Aili álggii artistan go ráhkadišgođii ođđasit lávlagiid mat ovdal leat almmuhuvvon, ja almmuhii daid YouTubii gos máŋga miljovnna olbmo miehtá máilmmi leat geahččan filmma.
Maŋŋel go beaggigođii, de bohte ollu ovttasbargobovdejumit eará riikkain.
2016:s oaččui son ollu beroštumi go beaggigođii YouTubes dovddus lávlagiin, «Faded», man Alan Walker lea dahkan. Lávlla, mas filbma lea, lea čájehuvvon measta njeallje miljovnna geardde.
Dan maŋŋel fuobmájedje nuortariikalaš DJ:at Darius & Finlay ja spánskalaš buvttadeaddji Marsal Ventura Aili, ja bovdejedje ovttasbargui.
Lávlla šattai nu bivnnuhin ahte lei ovcci vahkku buoremus lávlagiid fárus. Lávlla lei maid Lake Festivála almmolaš lávlla, mii lea Nuortariikka stuorámus dance-music festivála.
Lávlu ođđa lávlaga TV-gehččiide
Aili lea fitnan Studio Sámi guossis muitaleame iežas musihka birra, ja lávlu ođđa lávlaga doppe.
– Mus leat ollu plánat lagamus áiggis, ja lohpidan almmuhit eanet musihka dán jagi mielde, muitala Aili Studio Sámis, mii oidno NRK1:s gaskavahkku.
