-Almmuhus-
-Almmuhus-
-Almmuhus-
MAGASIIDNA– Lávllun gieđaiguin

– Lávllun gieđaiguin

-

-

Leat go goassege gullan visuealla musihka birra? Dás beasat oaidnit mii dat lea:

20-jahkásaš Tonje Merete Utsi, guhte lea Deanu šaldis eret, berošta musihkas nu mo olu eará su ahkásaččain.

Liikká ii leat Tonje Merete Utsi juste seammalágan go earát.

Go son riegádii ođđajagiruohta 1994:s lei son juste dego eará mánát. Golmma mánnosažžan son dattege buohccái vuoiŋŋašcuozzavulššiin (dárogillii hjernehinnebetennelse) ja oaččui gullanváttu.

– Mus lea heajos gullu, muhto láven lohkat ahte lean bealjeheapme, čilge Tonje Merete.

Vaikke leage lossa gullu, de musihkka lea sutnje álot leamaš dehálaš.

Dál leage almmuhan musihkkavideo mas dulko norgalaš artistta Sval, «Trenger deg» lávlaga suorbmagillii.

Dán lea dahkan go oassálasttii «Visuell Musikk» prošeavttas.

 

Mo dovdá musihka gulu haga?

Visuealla musihkka, dahje musihkka man sáhttá oaidnit, beakkehii albma duođas mannan giđa go ruoŧa «Meldodifestivalen» lávlagat dulkojuvvojedje maiddái suorbmagillii.

Muhto mo Tonje Merete vásiha musihka ja sáhttá dulkot dan?

– Mun dovddan musihka ritma, go mun hirbmadit liikon dánsut. Dan lean dahkan unni rájes. Ja go álggos ohppen dánsot, de mus lea jo ritma rupmašis. Dat bođii ávkin go galgen oahppat lávlut suorbmagillii.

 

Musihkkavideos oaidnit ge ahte son geavaha olles rupmaša go dulko lávlaga.

Tonje muitala ahte go galgá lávlaga sisdoalu gaskkustit de dat lea seamma ládje go dánsuma bokte.

Lea erohus váivves ráhkesvuođalávlagis ja jođánis feastalávlagis.

– Dánssun musihka mielde, sivvadit dahje jođánit. Gieđaiguin lávllun iešguđet ládje, sivvadit dahje jođánit. Ámadajuin maid čájehan sisdoalu, lean go suhtus, váivvis, movttet ja nu ain viidásat, muitala son.

 

– Bealjeheamit maid sáhttet


20-jahkásaš deatnulaš Tonje Merete Utsi niehku lea boahtteáiggis lávlut maiddái sámegiel suorbmagillii.
Priváhtagovva: Tonje Merete Utsi.​

«Visuell Musikk» prošeavtta lea Norgga bealjehemiid-lihttu hutkan, «Extrastiftelsen Helse og Rehabilitering» ges lea ruhtadan dán.

Statped ovttas Troanddima suorbmagiellaservviin leat lágidan dán.

Prošeakta álggahuvvui čakčamánus 2014:s ja loahpahuvvui dán čavčča, dan áiggis leat prošeavttas leamaš golbma čoahkkaneami gos 12 nuora leat beassan geahččaladdat musihka ja suorbmagiela.

Tonje Merete muitala iežas oahppan olu prošeavttas.

– Mun jáhkken ahte sáhtán dušše dánsut, muhto go beasan sihke suorbmagielain lávlut ja dánsut de dat lea mearehis buorre. Mus lea miella ráhkadit eanet musihkkavideoid, lohká son.

– Háliidan čájehit ahte musihkka lea seamma bealjehemiide go gulliide. Sii geain lea gullu sáhttet lávlut jienain, bealjeheamit ges suorbmagielain. Danne háliidan čájehit ahte goappašat joavkkut sáhttet geavahit musihka. Dehálaš čájehit ahte bealjeheamit maid sáhttet!

 

Tonje Merete lea álot beroštan musihkas, mánnán jo álggii dánsut. Dás beasat oaidnit filmmaža das go searvvai Nuoraid Kulturriemuide 2010:s.

(Čálus joatká vuolábealde)

 

 

Niehku lávlut sámegillii

Máilmmis gávdnojit vaikke man olu iešguđetlágan suorbmagiela, nu mo eará gielat ge.

Sámegiel suorbmagiella maid gávdno, muhto dan ii loga Tonje Merete vuos máhttit.

– Muhtin čáppa beaivvi áiggun lávlut sámegiel suorbmagillii. Mu niehku lea gávdnat sámegiellávlaga mas ráhkadan musihkkavideo gos áhči boazodoallu vel oidno.

 

 

 

 

 

 

 

-Almmuhus-