Olu norgalaččat dáidet behtohallan odne go Norga vuosttaš geardde viđa jahkái ii beassan viidásat finálii. Dát guovttos goittot ge eaba láitte.
Daniel Kolsrud ja Eirik Rosenkrants leigga Kristiansunddas mátkkoštan Stockholmii čuovvut Agnete Eurovision-gilvvus. Vaikke goappašagat leigga sávvan Norgga beassat finálii de rámideaba Agnete.
– Agnete dagai máilmmi buori barggu, ii leat su sivva go ii beassan viidásat. Su lávlla dattege soittii leat menddo ođas ja ođđamállet iige Eurohpá soaitán áddet dan, lohkaba soai.
– Dát lea dakkár lávlla man fertet moddii guldalit ovdal go áddet dan, muhto lea máilmme buorre lávlla.
Rámis
Soai gal lohkaba iežaska liikká leat rámis norgalažžan odne, vaikke Norga ii lihkostuvvan ge oassefinálas beassat finálii.
– Agnete lávllui áibbas čielgasit, sus lei «ráinnas» jietna ja ovdanbuvttii bures.
– Moai ledne rápmásat go ledne norgalaččat odne, lohkaba soai.
Vuosttaš geardde viđa jahkái
Norga ii beassan viidásat Eurovision finálii, mii lágiduvvo lávvardaga Stockholmas. Nubbi davviriika mii ii beassan viidásat odne, lei Danmárku.
Lea vuosttaš geardde viđa jahkái go Norga ii oassálastte Eurovision finálas.
