Guokte beakkán sámi artistta almmuheaba lávlaga bearjadaga.
Rap-artista Ailu Valle gussostallá sámemusihkkára Ánnámáreha lávlagis «Johtit ain», čállá Ánnámáret preassadieđáhusas. Lávlla lea almmuhuvvon vuosttas háve «Nieguid duovdagat» skearrus guovvamánu, muhto ođđa veršuvnnas Ailu Valle ráppe sámegillii iežas teavstta.
– Ánnámáreha luohti ja Turkka komposišuvdna dolvo mu čáledettiin niehkomáilbmái, gos jođán áiggiheamet Sámi duovdagiin, muitala Ailu Valle čállinproseassa birra.
Ailu Valle ja Ánnámáreha ođđa musihkalaš ovttasbargu almmuhuvvo borgemánu 13. beaivvi.
– «Johtit ain» -lávlaga stiila lea diekkár, ahte dat meastá jo gáibida rap mielde. Mii illudit ovttas oba «Nieguid duovdagat» -joavkkuin, go Ailu Valle álggii ovttasbargui minguin. Lea stuorra gudni bargat Ailluin, guhte lea čeahpes musihkkár ja giellameašttir, muitala Ánnámáret.
Johtit ain featuring Ailu Valle -lávlla gávdno rávdnjen-bálvalusain ja Ánnámáreha youtube-kanálas bearjadaga rájes. Skearru musihka leat ovttas ráhkadan Ánnámáret (luođit), Ilkka Heinonen (jouhikko) ja Turkka Inkilä (elektronihkka ja shakuhachi). Turkka Inkilä lea maiddái buvttadan skearru.