-Almmuhus-
OĐĐASATLávke journalistavirggis redaktevran

Lávke journalistavirggis redaktevran

-

-

Ođđa mediaásahus iSámi.Press lea dál almmuhan iežaset ođđa redaktevrra.

Anne Rasmus lea bargan journalistan Ávviris lagabui guhtta jagi, muhto lea dál válljen lávket redaktevravirgái iSámi.Press mediaásahussii.

Guovvamánu 10. beaivvi lea sus maŋimuš bargobeaivi Ávviris ja álgá ođđa virgái 13. beaivvi dán mánus.

 

Liiko hástalusaid

Rasmus ii lean vuordán dán bargofálaldaga go ii lean ohcan dán virgái, danne dárbbašii veaháš áiggi veardádallat ja čielggadit iešguđet beliid ovdal mearridii maid dahká.

Son lohká iežas liikot hástalusaid, ja danne orru ge dá miellagiddevaš bargu ja vejolašvuohta maid ii sáhte massit.

– Illudan leat mielde ovdánahttime sihke sámegiela ja sámi mediafálaldaga. Giellagáhtten lea hui dehálaš, ja dat lea ge stuora oassi dán barggus maid. Baldá gal dieđusge veahá ná stuora virgi, buot lea ođas. In ge eahpit ahte leat olu hástalusat vuordimis, lohká Rasmus.

 

Hárjánan journalista

iSámi.Press beaivválašjođiheaddji, Jan Skoglund Paltto, lea duhtavaš go Rasmus válddii vuostá bargofálaldaga.

Maiddái sutnje lea giellagáhtten dehálaš, ja oaidná ođđa redaktevrra giellahálddašeami hui mávssolažžan.

– Son lea hárjánan journalista geas lea hui buorre sámegiella. Son hálddaša máŋga giela, mii addá viidát vejolašvuođaid, earret eará suomabealde. Sus lea sihke journalistihkalaš ja servodat áddejupmi, mii lea hui mávssolaš eaktu dán virgái. Dasa lassin lea son movttegis ja positiiva olmmoš, geainna illudan ovttasbargat, lohká Jan Skoglund Paltto.

 

Giitevaš

Guovvamánu 16. beaivvi livčče Anne Rasmusis dievvan guhtta jagi journalistan Ávviris.

Son lohká illudit álgit ođđa virgái, ii ge guođe Ávvira heajos mielain.

– Lean oahppan issoras ollu ja vásihan vaikko maid, dan olis maiddái ovdánan sihke dan suorggis ja maiddái olmmožin, dan áiggis go lean bargan Ávviris, loahpaha son.

-Almmuhus-