-Almmuhus-
-Almmuhus-
-Almmuhus-
SMÁVVAOĐĐASATLassiárvo­divat elektrovnnalaš aviissaide

Lassiárvo­divat elektrovnnalaš aviissaide

-

-

Ráđđehus lea sádden gulaskuddamii evttohusa mii galggašii muddet gáibádusa teaksta- ja govvasisdollui vai lea vejolaš vuovdit aviissaid lassiárvodivada haga.

– Lassiárvodivat (momsa) ii berreše gáržžidit aviissaid jietna- ja ealligovvageavaheami. Mii dárbbašat mediamáŋggabealatvuođa ja mis fertejit leat njuolggadusat veahkkin viiddidit fálaldaga. Mii háliidat ahte báikkálaš aviissat miehtá Norgga vuoruhivčče eambbo jietna- ja ealligovvageavaheami, ja ahte galget ain leat lassiárvodivada haga, lohká ruhtadanministtar Trygve Slagsvold Vedum (Guovddášbellodat) preassadieđáhusas.

Elektrovnnalaš ođasbálvalusaid ovddas ii leat dárbbašan máksit lassiárvodivada, muhto 2023 stáhtabušeahtta heaittihii dan ortnega. De ii sáhttán šat vuovdit TV-kanálapáhkaid ja rávdnjenbálvalusaid lassiárvodivada haga. Dat maid ráddjii man olu video- ja jietnasisdoalu aviissas sáhttá vuovdit lassiárvodivada haga. Stuorradiggi bivddii ráđđehusa stáhtabušeahttameannudeamis «árvvoštallat doaimmaid sihkkarastin dihtii ahte báikkálaš- ja guovlluaviissaid vejolašvuohta buvttadit video ja jiena ii ráddjejuvvo lassiárvodivada rievdadeami dihtii». 

– Mii bijaimet fas lassiárvodivada elektrovnnalaš bálvalusaide dan dihte go dat geavahuvvui dasa ahte unnidit lassiárvodivatgolu TV-guoimmuheami vuovdimis. Dattetge lea dehálaš ahte aviissat sáhttet váldit atnui dálá áigásaš teknologiija almmá nu ahte ii divrro lassiárvodivadiin. Dát evttohus láhčá diliid dasa, lohká ruhtadanministtar Trygve Slagsvold Vedum.

-Almmuhus-