Stuorradiggi čuovvolii ráđđehusa evttohusa ja lasihit 30 miljovdnasaš doarjaga heahtegearggusvuođafondii.
– Mun lean ilus go Stuoradiggi odne mearridii čuovvolit ráđđehusa evttohusa lasihit heahtegearggusvuođadoarjaga 30 miljovnna ruvnnuin, dadjá eanandoallo- ja biebmoministtar Sandra Borch preassadieđáhusas.
Boazodoalu šiehtadusbealit leat boahtán ovttaoaivilvuhtii ja dahket rievdadusaid ortnegis mii guoská doarjagii heahtegearggusvuođa oktavuođas. Vuođđodoarjja loktejuvvo 4,50 ruvnnos 5 ruvdnui juohke bohccos, dasa lassin galgá vel 2,3 miljovnna liigedoarjagis mannat guorbmebiillaiguin johttit geassebáikkiide.
Lea vejolaš ohcat 0,18 ruvnno juohke bohcco ovddas, juohke kilomehteris maid šaddá geasehit go johtá dálveorohagas geasseorohahkii.
– Dáinna juolludemiin leat mii gávdnan buriid čovdosiid dasa mo veahkehit boazoeaiggádiid dáid guohtunroasuid čađa, dadjá eanandoallo- ja biebmoministtar Sandra Borch.