Sámediggeráđđi čuovvula Beaiveálggu álginjulggaštusa ja lasiha máksomeari sámegiela gelbbolašvuhtii doarjjaortnegiid bokte sámi mánaidgárddiide ja ossodagaide, lassin lasihit vel álggahandoarjaga.
– Mii nannet áŋgiruššama rekrutteremis ja viggamušas oažžut sámegiela sámi mánáidgárddiide, dadjá sámediggeráđđi Mikkel Eskil Mikkelsen (NSR) preassadieđáhusas.
Sámediggeráđđi lasiha máksomeriid doarjjaortnegiin «Doarjja sámi mánáidgárddiide ja ossodagaide», ja addá 16 000 ruvnno lasi gitta guovtti sámegielat bargái. Juohke mánáidgárdi ja ossodat sáhttá ohcat doarjaga guovtti bargái juohke ossodahkii. Dat addá lasi bálkádoarjaga sámi mánáidgárddiide ja ossodagaide olles Sámi servvodagas.
– Mii dahkat mánáidgárddiide vejolažžan loktet bálkádási, seammás go Sámedikkis lea stuorebuš kvalitehtabargu jođus mánáidgárdeprošeavtta SáMOS bokte. Dáinna lágiin hukset buori vuođu lihkostuvvat mánáidgárddi giellabargguin, dadjá Mikkelsen.
Lasi doarjaga sámi mánaidgárdefálaldagaid álggahit
Seammás lassána máksomearri sámi mánaidgárdefálaldahkii 300 000 ruvnnos 500 000 ruvdnui doarjjaortnegis «Doarjja prošeavttaide ja ovddidanbargui».
Mikkelsen čujuha dasa ahte lea dárbu eanet sámegiel mánáidgárdefálaldagaide.
– Mii lasihit doarjaga sámi mánáidgárdefálaldaga álggaheapmái movttiidahttin dihte mánáidgárdeeaiggádiid viiddidit ja ásahit eanet fálaldagaid. Sávan dan váikkuhit dasa ahte biddjojit johtui konkrehta ásaheamit, vai sámi mánát oččoše sámi mánáidgárdesaji fálaldaga, dadjá son.
Gelbbolašvuohta ja rekrutteren lea dehálaš
Sámediggeráđđi lea Beaiveálggu álginjulggaštusas vuoruhan doaibmabijuid duostut sámi mánáidgárddiid ja skuvllaid gelbbolašvuođakriisa. Earret eará cealká Beaiveálgu ahte galget bargat dan ala ahte bálkádásit loktanit mánáidgárde- ja vuođđoskuvlaoahpaheddjiide. Mikkelsen dadjá ahte máksomeriid lassáneapmi sámegielat bargiide lea guovddáš doaibmabidju dustet gelbbolašvuođakriisa.
– Okta min stuorimus bargguin lea bargat dan ovdii ahte sámi mánát ja nuorat ožžot buori sámegielfálaldaga mánáidgárddis, danne go doppe dat giellabargu máŋgga ládje álgá. Danne fertet dagahit mánáidgárddiid geasuheaddji bargosadjin, dadjá Mikkel Eskil Mikkelsen.
Oassi stuorit áŋgiruššamis
Ovttasbargoguoimmit Beaiveálgu-ovttasbarggus leat čujuhan sámi mánáidgárddiid erenoamáš áŋgiruššansuorgin dán sámediggeáigodagas. Mikkelsen dadjá ahte dás leat lohpádusat eanet doaibmabijuid álggahit.
– Doarjjaortnegiid máksomeriid lasihit lea vuosttaš lávki, boahtte lávki lea álggahit barggu oččodit nuvttá sámi mánáidgárdesajiid. Dákko bokte sávan ahte eanet sámi mánát ožžot mánáidgárdefálaldaga mii lea vuođđuduvvon sámi gillii ja kultuvrii, nu go sis lea vuoigatvuohta oažžut, loahpaha Mikkelsen.
