-Almmuhus-
-Almmuhus-
OĐĐASAT Lásságámmi vuođđudusas ođđa stivrajođiheaddji

Lásságámmi vuođđudusas ođđa stivrajođiheaddji

-

-

Lásságámmi vuođđudusa jahkečoahkkin lea válljen Kirsti Lervoll ođđa stivrajođiheaddjin. Son ovddasta Romssa ja Finnmárkku fylkkasuohkana vuođđudusstivrras.  

Kirsti Lervoll (41) lea Gáivuonas eret ja orru Romssas. Son lea Riddu Riđu ovddeš festiválajođiheaddji, ja sus leat leamašan muhtun stivradoaimmat kultur- ja ealáhussuorggis. Beaivválaččat son bargá Davvinorgga Jođiheaddjeovddideami (Nordnorsk Lederutvikling) nammasaš doaimma prográmmajođiheaddjin. Son váldá badjelasas doaimma Anne Dalheim maŋis, guhte lea leamašan stivrajođiheaddjin badjel 10 jagi.

— Lea suohtas válljejuvvot Lásságámmi vuođđudusa jođiheaddjin. Áillohačča dáidagis lea čielga sámi šuokŋavuođđu, seammás go movttiidahttá mu ahte su filosofiija, dáidda ja ovttasbargoprošeavttat ledje rádjerasttideaddji – sihke šáŋŋera ja geografiija dáfus. Dán mun háliidan ahte Lásságámmi vuođđudus galgá reflekteret min barggus vára váldit ja ovddidit kultuvrralaš ja vuoiŋŋalaš árbbi Nils-Aslak Valkeapääs maŋis, dadjá aiddo válljejuvvon stivrajođiheaddji Lervoll preassadieđáhusastis.

Lásságámmi. Govven: Tore Figenschau
Lásságámmi. Govven: Tore Figenschau

Rápmásat go dáiddár- ja dutkiviessu lea bures ásaiduvvan

Lassin áimmuhuššat ja ovddidit Áillohačča kultuvrralaš ja vuoiŋŋalaš árbbi, de lea Lásságámmi vuođđudusa bargun jođihit dáiddár- ja dutkiviessu Lásságámmi Ivgus. Lásságámmi mearkkaša «Šleađđogoahti», mii govvida viesu arkitektuvrra ja sajádaga. Áiggiid mielde leat ollu buvttadusat hábmejuvvon ja riegádan dan earenoamáš dáiddárviesus mii lea olggumusas lássá alde Ivgus.

– Jahkásaččat váldit vuostá logenáre dáiddára ja dutki geat atnet viesu kreatiivvalaš orodeapmái, ja mii leat rápmásat go dáiddár- ja dutkiviessu lea bures ásaiduvvan ja ahte ollu čeahpes dáiddárat ja dutkit miehtá máilmmi ohcet orostallama dáppe, dadjá Lervoll.

 Illuda bargguide

Valkeapääs nákca movttiidahttit dáiddáriid ja dutkiid miehtá máilmmi dahká stivrra barggu stuorisin ja máŋggabealagin. Stivrras sus leat fárus Niko Valkeapää (Sámeráđđi), Joar Nango (Sámediggi), Lena Arekol (UiT Norgga árktalaš universitehta) ja Anne-Maret Labba (árbbolaččat) ovttas aiddo válljejuvvon ovddasteddjiin ja várrejođiheddjiin Lars Einar Gardeniin (Omasvuona suohkan).

­ – Mun illudan ovttasbargat stivrrain ja vuođđudeddjiiguin joatkit dan dehálaš barggu dahkat Lásságámmi vuođđudusa dovddusin ođđa formáhtain ja eambbogiidda, dadjá Lervoll.

- Advertisement -
-Almmuhus-