Ikte almmuhii Sámediggeráđđi 2023 bušeahttaevttohusa. Eanetlogu politihkkár dadjá gáržžes bušeahttadilli lea dagahan ahte leat šaddan vuoruhit gosa juolludit ruđaid.
– Vaikke vel lea gáržžes bušeahttadilli, de lean duđavaš go Beaivváš Sámi Našunálateáhter ja RiddoDuottarMuseat leat vuoruhuvvon, lohká NSR sámediggeáirras Maren Benedicte Nystad Storslett preassadieđáhusas.
Beaivváš Sámi Našunálateáhterii lea evttohuvvon 500 000 ruvdnosaš lassáneami boahtte jagi.
– Beaivvážis lea dehálaš bargu ovdánahttit ja čalmmustit sámi muitalanárbevieruid ja lávdedáidaga. Mun illudan go beassat ođđa vistti galledit. Jáhkán maid olu miellagiddevaš ovttasbargguid buktit go Beaivváš ja Sámi joatkkaskuvla šaddet seamma dáhki vuollái, dadjá Nystad Storslett.
Eanetlohku lea maid evttohan 300 000 ruvnnu lasáhusa RiddoDuottarMuseaide.
– RiddoDuottarMuseain lea dehálaš bargu hálddašit ja gaskkustit sámi dáidaga. Mii fertet sihkkarastit RDM buori eavttuid oastit sisa, fuolahit ja gaskkustit min dehálaš kulturárbbi, čilge son.
Lassin evttohuvvo Sámi allaskuvlii 500 000 ruvdnosaš álggahandoarjaga čálliidohppui.
– Dát vuoruheamit, oktan dan stuora bušeahttavuoruhemiin nuvttá sámi mánáidgárdesajiide ja rekrutteremii fertet dádjat ahte mis vuordá miellagiddevaš áigi, čilge Nystad Storslett
