-Almmuhus-
SMÁVVAOĐĐASATLasihit bearrái­geahčuid: – Gárren biila­vuoddjit leat dego coahkki bombbat

Lasihit bearrái­geahčuid: – Gárren biila­vuoddjit leat dego coahkki bombbat

-

-

Dán vahkkus lea «Aksjon rus» ja dan oktavuođas čađahit politiijat eanet bearráigeahčuid main isket leat go biilavuoddjit čilgosat. Dán jagi leat dássážii 7 proseantta eanet olbmot váidojuvvon vuodján gárrenoaivvis go diibmá. 

Geassemánu 14. beaivvi álgá akšuvdnavahkku Norggas ja máŋga eará Eurohpá riikkas. 

– Min bargun lea váikkuhit vai buohkaide livččii dorvvoleabbot vánddardit johtolagas. Jus leat gárremiin, de leat váralaš vuoddji ja sáhtát dagahit sihke iežat ja earáid ovdii, lohká Johtolatpolitiijaid jođiheaddji Knut Smedsrud. 

Politiijat leat dássážii dán jagi váidán 4993 biilavuoddji geaid navdet vuodján gárrenoaivvis. Diibmá lei lohku 4683 ja ovddit jagi ges 4042. 

– Dá lea duođalaš ovdáneapmi. Politiijat čađahit gárrendillebearráigeahčuid eastadan dihte duođalaš lihkohisvuođaid. Lea hirbmat váralaš vuodjit gárrenoaivvis. Juohke goalmmát duođalaš johtolatlihkohisvuohta, mas olmmoš jápmá dahje roasmmehuvvá garrasit, dáhpáhuvvá danin go muhtin vuodjá gárrendilis. Jus leat veahá ge eahpádusas, de it galgga vuodjit biillain, lohká son. 

Coahkki bomba

Av-og-til organisašuvdna ovttasbargá Johtolatpolitiijain gárrendille-akšuvnna olis.

– Gárren biilavuoddjit leat dego coahkki bombbat, gárrendilis oainnat váldet olbmot stuorát riskkaid ja leat eanet impulsiivvat. Seammás leat čuorbbit árvvoštallat váikkuhusaid ja olbmo reakšuvdna ja fuomášupmi hedjona. Dat kombinašuvdna sáhttá jámolaš, lohká Av-og-til doaibmi váldočálli Eli Marie Stavrud. 

Diibmá jápme 116 olbmo Norgga johtolagas, mii lea beali eanet go 2021:s. 

– Jus vuodjá gárrenoaivvis, de lea 68 gearddi stuorát vára seahkánit johtolatlihkohisvuhtii go čielggosoaivvis. Juohke njealját jápminlihkohisvuođas diibmá fuomášuvvui gárrenmirkogeavaheapmi. Mis ii leat várri massit olbmuid dáinna lágiin, loahpaha Stavrud.  

-Almmuhus-