Sámiráđđi lea virgádan Eirik Larsen – Lásse-Ivvár Erkke Sámiráđi olmmošvuoigatvuođaossodaga jođiheaddjin.
Larsen lea jurista ja lea eret Skániin. Son álgá virgái borgemánus.
– Eirik Larsenis lea guhkes hárjáneapmi bargat álgoálbmogiid olmmošvuoigatvuođaiguin iešguđetlágan rollain sihke nationála ja riikkaidgaskasaš dásis. Mii leat hui ilus go beassat ávkkástallat su nana gelbbolašvuođain, dadjá Sámiráđi váldočálli Áile Jávo preassadieđáhusa bakte.
Norgga departemeanttas
Larsen lea maŋimuš vihtta jagi leamaš politihkalaš ráđđeaddin Norgga beale Sámediggeráđđái. Son lea ovdal bargan sámi áššiiguin Norgga departemeanttain, ja dovdá maiddái Sámiráđi bures ovdalaččas go son álggii sadjásažžan virgái, masa son dál álgá, olmmošvuoigatvuođaossodagas 2017:s.
Larsen ieš dadjá ahte lea stuorra illu fas searvat Sámiráđi bargui.
– Mun lean ilus go beasan bargat sámi organisašuvnnas ja áššiiguin maidda mus lea stuorra beroštupmi. Olmmošvuoigatvuođat leat áitojuvvon, ja sámi siviilaservodagas lea hui deaŧalaš rolla sihke sámiid ja eará álgoálbmogiid olmmošvuoigatvuođaid suodjaleamis ja ovddideamis, dadjá Eirik Larsen preassadieđáhusa bakte.
