-Almmuhus-
OĐĐASATLarsen fuolastuvvá go heaittihit 10 virggi

Larsen fuolastuvvá go heaittihit 10 virggi

-

-

Sámediggeráđđi lea beahttašuvvamiin Finnmárkku buohcciviesu mearrádussii heaittihit 10 virggi fáhkka ambuleanta joavkkus psykiátralaš dearvvašvuođas gokčan dihtii doaimma vuollebáhcaga.

– Mii leat sakka fuolastuvvan fálaldaga geažil sámi buhcciide, dadjá Sámedikki presideanta Vibeke Larsen preassadieđáhusas ja joatká.

– Erenoamážit go eará fálaldagat Finnmárkkus ja riikkas muđui eai leat láhčán sámegiela ja kulturmáhtu geavaheapmái. Seammás mii oaivvildit ahte lea hui eahpegovttolaš ahte SÁNAG ja fálaldat sámi buhcciide Finnmárkkus galgá gillát stuorámus oasi seastimis, lohká son.

 

Veadjemeahttun go billistit

Sámediggi lea, ovttas Davvi Dearvvašvuođain ja guovddáš eiseválddiiguin, bargan máŋga jagi ovddidemiin dearvvašvuođabálvalusaid sámi buhcciide. Dan boađusin lea SÁNAG ásaheami stáhta ruđaiguin.

– SÁNAG lea šaddan psykalaš dearvvašvuođa ja gárrenmirkkuid ofelažžan ja lea rámiduvvon sihke riikka siste ja riikkaidgaskasaččat. Earret eará oaidnit ahte min ránnjáriika dahká šiehtadusaid Davvi Dearvvašvuođain vai ožžot ávkki SÁNAGa gelbbolašvuođas. SÁNAGas lea maid fálaldat riikka eará osiid sámi buhcciide, ja guovddáš eiseválddit ja earát čujuhit SÁNAGii go dárbbašuvvojit doaibmabijut ja veahkki dakkár váttis áššiin go “Divttasvuona áššis”. Go Finnmárkku buohcciviessu billista SÁNAG, de lea veadjemeahttun ollašuhttit daid vuordámušaid mat mis leat SÁNAGii ja sin bargamušaide, lohká Sámedikki presideanta.

 

Joatkkan ovddeš čovdosiidda

Son čujuha maid dasa ahte Davvi Dearvvašvuohta lea addán Finnmárkku buohccivissui erenoamáš ovddasvástádus das ahte sihkkarastit bálvalusfálaldaga sámi buhcciide, muhto orru leamen nu ahte Finnmárkku buohcciviesus ii lea ii dáhttu ii ge nákca fuolahit sámi buhcciid.

– Sámediggeráđđi gávnnaha ahte Finnmárkku buohcciviesu easkabáliid mearrádus lea joatkkan ovddeš čovdosiidda ja proseassaide mat mielddisbuktet sámi dearvvašvuođabálvalusaid geahpedeami, dadjá Larsen.

 

Luohttámuš sakka hedjonan

– Sámedikki bealis mii fertet šállošit go min luohttámuš Finnmárkku Buohccivissui dál lea sakka hedjonan, dadjá Sámedikki presideanta Vibeke Larsen, ja loahpaha dainna ahte dál lea áigi árvvoštallat eará organisašuvdnačatnaseami sámi spesialistadearvvašvuođabálvalusa várás.

-Almmuhus-