Sihkkelasti dolvojuvvui Romssa Universitehtabuohccivissui.
Sotnabeaivve iđida sullii diibmu 09.30 bođii Finnmárkku politiijaide diehtu ahte lea leamaš johtolatlihkohisvuohta mas biilavuoddji vujii sihkkelasti njeaiga. Lihkohisvuohta dáhpáhuvai Lákkovuonbađas, Álttá suohkanis.
Operašuvdnajođiheaddji, Leo Johansen, čilge ahte lea dáhpáhuvvan go biilavuoddji áiggui sihkkelasti meaddel vuodjit.
– Sihkkelasti lei álggos gozuid alde, muhto de jámálgišgođii ja son dolvojuvvui Romssa Universitehtabuohccivissui ambulánsagirdiin, dadjá Johansen.
Sihkkelasti lei badjelaš 60-jahkásaš dievdu Finnmárkkus eret, ja biilavuoddji fas badjelaš 20-jahkásaš dievdu Romssas eret.
– Biilavuoddji dolvui ambulánssain Buvrovuona dearvvašvuođaguovddážii iskosii, muhto son ii lean fysalaččat roasmmehuvvan. Biilavuoddji vuodjinkoarta duoguštuvvui, dadjá Johansen.
