23-áigge duorastateahkeda dieđihuvvui ahte riikkageaidnu 93 lea gitta Silisávžžis uđđasa dihte. Luodda galgá leat fas gaskaboddosaččat rabas dál, dieđiha Stáda geaidnodoaimmahat.
Riikkageaidnu 93, golbma miilla Álttá lulágeahčen lea gitta dál, dieđihedje politiijat Twitteris duorastateahkeda.
Diibmu 00.23 rahppui fas luodda.
– Luodda lea fas rabas dál, juobe gaskaboddosaččat, ja mii leat sihkkarastán uđasbáikki ja vuordit geologa boahtit Silisávžái geahččat uđasvára, muitala Stáda geaidnodoaimmahaga huksenjođiheaddji Øyvind Bjørnå Ávvirii.
Sivvan lea go láireuđas lea fierran luotta ala. Ii okta ge biila dahje olmmoš galgga leat geavvan uđđasii, čálle politiijat Twitteris.
Bjørnå muitala ahte birrasiid 30 mehtera luoddaáidi lea billahuvvan dan uđđasis, ja fertejit maid čorget uđasbáikki.
