Sámi allaskuvlla láidesteaddji, Jan Henry Keskitalo lea ikte nammaduvvon gudnedoavttirin allaárvosaš Winhec seremoniijas, Kanadas.
Sámi allaskuvlla láidesteaddji, Jan Henry Keskitalo lea ikte nammaduvvon gudnedoavttirin allaárvosaš Winhec seremoniijas, Kanadas.
Jan Henry Keskitalo lei Sámi allaskuvlla vuosttaš rektor, ja son lea áŋgiruššan sámi oahpahusain sihke Sámis ja eamiálbmot ja riikkaidgaskasaš dásis. Ikte nammaduvvui son gudnedoavttirin, čállá Sámi allaskuvla preassadieđáhusas.
Čevllohallet
Sámi allaskuvllas sávvet váimmolaš lihku Keskitaloi nammademiin, rektor lohká čevllohallat.
– Mii leat hui ilus ja čeavlái go doseanta emeritus sámi oahpahusas ja Sámi allaskuvlla láidesteaddji Jan Henry Keskitalo lea nammaduvvon WINU (World Indigenous Nations University) gudni doavttirin, dadjá Sámi allaskuvlla ođđa rektor Gunvor Guttorm.
Árvvusatnet
Sámi allaskuvlla prorektor Line Kalak lei mielde go Keskitalo ikte nammaduvvui gudnedoaktáriin. Maiddái son illuda dáinna.
– Jan Henry Keskitalo lea bidjan ollu searaid WINHECII ja oažžut áigái WINU. Dát nammadeapmi čájeha ahte WINHECas leat árvvus atnán Keskitalo bargguid, lohká Kalak.
Eamiálbmot allaoahpu ásahusat čoahkkanan
Winhec ásahuvvui 2002:is ja lea organisašuvdna mii čohkke eamiálbmot allaoahpu ásahusaid.
Dáid beivviid dollet sii jahkásaš čoahkkima, dán háve Seven Generations oahppoinstituhtas Nanicost gávpogis, Fort Frances, Ontarios Kanadas.
