IL Nordlys jovkui leat máŋga hárjánan spábbačiekči máhccan ruovttoluotta, ja okta sis, Jon Andreas Rognerud Eira, atná lunddolažžan ahte sus lea ovddasvástádus nuorat čikčiide joavkkus spábbačiekčanšiljus.
IL Nordlys jovkui leat máŋga hárjánan spábbačiekči máhccan ruovttoluotta, ja okta sis, Jon Andreas Rognerud Eira, atná lunddolažžan ahte sus lea ovddasvástádus nuorat čikčiide joavkkus spábbačiekčanšiljus.
Kárášjoga spábbačiekčanjovkui IL Nordlysii, mii čiekčá 4.divišuvnnas Finnmárkkus, leat dál máhccan ovddeš čiekčit ruovttoluotta. Sii leat ožžon njeallje ođđa čiekči, ja okta dain leage Jon Andreas Rognerud Eira (28), gii lea čiekčan sihke Porsáŋggu IL ja Álttá IF ovddas 1. divišuvnnas.
Vel eanet vuoitit
Mannan lávvordaga čikče IL Nordlys vuosttaš čiekčamiid čakčaáigodagas, Čáhcesullo joavkku Norild vuostá, mii lea goalmmádin bajimusas tabeallas. Nordlys, mii lei ges nubbin vuolemusas, časkkii Norild 1-0 ruovttušiljus Niitoguolbanis. IL Nordlys hárjeheaddji Rasmus Somby lea hirbmat duhtavaš, ja vuordá gelddolaš čavčča.
– Vaikko čiekčamiin ii lean go Jon Andreas ođđa čikčiin mielde, de leimmet nu ollu buorebut go Norild ja leimmet galgat vuoitit vel eanet, lohká son.
Loktejit dási
Somby vuordá buot njeallje ođđa čiekči, Nijlas Ivvár J. Eira, Nils Máhtte Rognerud Eira, Niillas Henry Nystad ja namuhuvvon Jon Andreas Rognerud Eira leat buohkat fárus boahtte čiekčamis Báhcavuona vuostá.
– Mis lea nuorra joavku, ja go hárjánan čiekčit, geain lea hárjáneapmi alit divišuvnnain, máhccet ruoktot, de dat loktejit dási dain nuorat čikčiin maid.
Doalahit ovdáneami
Somby lohká go dássi buorrána joavkkus, de besset nuorra buorit čiekčat guhkit Nordlysas, eaige dárbbaš nu árrat guođđit ruovttujoavkku.
– Gánddat nagodit doalahit ovdáneami go min hárjehallamiin šaddá maid buoret dássi go albmát leat boahtán ruoktot, ja nu šaddá gilvu sajiid alde joavkkus. Dat dagaha ahte ferte garrasit hárjehallat, ii ge 4. divišuvnnas leat dušše mannat šilju ala jáhkkit ii leat dárbu nu ollu hárjehallat, lohká Somby.
(Ášši joatká gova vuolábealde)
Buorre dovdu
Jon Andreas Rognerud Eira ii leat čiekčan Nordlys ovddas 2008 rájes ja lohká lei erenoamáš fas ovddastit IL Nordlys.
– Lei hui erenoamáš ja somá fas lávket Niitoguolbba rássešilljui, ja lei hui buorre dovdu. Lea maid buorre mokta joavkkus, lohká son.
Lunddolaš nevvodit nuorat čikčiid
Rognerud Eira mieđiha ahte dovdá ovddasvástádusa nuorra gánddaide šiljus, dan olis go lea hárjánan čiekči.
– Mun dovddan lea hui lunddolaš ahte munnje biddjo ovddasvástádus, gii lean guhká čiekčan alit dásis. Munnje lea maid hui lunddolaš oahpahit, nevvodit ja čájehit nuorat čikčiide iežan máhtu ja dan maid dieđán spábbačiekčanšiljus, lohká son.
Dehálaš doarjut
Hárjeheaddji Rasmus Somby lea hui giitevaš go čiekčit leat boahtán ruoktot, ja sávvá maiddái geahččit anáše dan árvvus.
– Livččii dehálaš ahte báikki olbmot dorjot joavkku ja boađáše geahččat čiekčamiid, go dat maid doalaha ahte mokta bissu nuorra čikčiin.
Mihttu doalahit saji
Somby lohká mihttu lea dán jagi vuos bissut 4. divišuvnnas, eai ge vel smiehta nu ollu mii boahtteáiggis geavvá. Son lohká sis leat nuorra čiekčit geat sáhttet áiggi mielde lávket alit divišuvnnaide, muhto ii justa bala ahte stuorit joavkkut vižžet čikčiid.
– Mis gal lea hui buorre oktavuohta nu movt Álttá IF:in, ja maŋemus 20 jagis leatge ollu kárášjohkalaččat ovddastan sin joavkku. Mii gal gulahallat singuin jus dat šaddá áigeguovdilin, lohká hárjeheaddji Rasmus Somby.
