Álttá dievdu, guhte lei dieđihuvvon láhppon, ja gean baláhedje duššan, son lea dál gávdnon jápmán.
Álttá dievdu, guhte lei dieđihuvvon láhppon, ja gean baláhedje duššan, son lea dál gávdnon jápmán.
Politiijat dieđihit Twitter bokte ahte badjel 60-jahkásaš Áltá dievdu, gean balahedje duššan, lea dat gii lea gávdnon duššan Stuorajávrái, 2 miilla Guovdageainnu guovddašbáikki davábeale.
Son gávdnui birrasiid 18.00, ja duođaštuvvui duššan. Lei Sea King gádjunhelikopter mii gávnnai liika.
Dovddai
Finnmárkku politiijaguovllu operašuvdnajođiheaddji, Andreas Vesterhus, muitala ahte liika maid leat gávdnan lea dat gean leat eahketbotta ohcan Stuorajávrris.
– Liika gávdnui čázis, ja lei báikkálaš Rukses Ruossa ohcanveagas okta guhte sáhti duođaštit ahte lea Áltá dievdu gean leat gávdnan jápmán, go son dovddai su, muitala son.
Fanás govddoda
Lei birrasiid 16.00 go politiijat ožžo dieđi ahte guoros fanas govddoda Stuorajávrri alde. Mohtora lei vuollin, vuoddjin ládje, muhto fatnásis ii oidnon olmmoš.
– Su ledje juo seamma olbmot oaidnán jávrri alde ikte, dalle lei olmmoš fatnasis. Dat lea maŋemus go sáhtte sihkkarit daddját su oaidnán. Go odne fas oidne fatnasa, de dieđihedje politiijaide.
Barta guovllus
Dievddus lea barta guovllus. Barta lei lásas, ja su ATV lei barta olggobeale, nu ahte politiijat jáhkke son ii lean mannán gosage guhkkelebbui bartaguovllus.
