Finnmárkku Politiija dieđiha ahte vuorrasat nisu, gii dieđihuvvui láhppon Idjavuonduoddaris ievttá eahkeda, lea gávdnon heakkas iđđedis.
Finnmárkku Politiija dieđiha Twittera bokte ahte muorječoaggi, gii ii lean boahtán ruoktot vuossárgga gaskaija rádjái, gávdnui maŋŋebárgga iđida.
Son lea buori vuoimmis, muhto galbmon.
73-jahkásaš nisu lei fitnan Idjavuonduoddaris murjjiid čoaggimin ja go ii lean boahtán ruoktot 12 tiimma maŋŋá, de ohcagohte su.
Viessobuollin Deanus
Finnmárkku Politiija dieđiha Twittera bokte ahte vuossárgga eahkeda ožžo dieđu ahte viessu lei buollimin Horpmás Deanus.
Heahteveahkkeásahusat doapmaledje vájut báikái. Viessu lei ollásit buollimin go jovde dohko. Ii oktage lean viesus.
Golmma tiimmu maŋŋá lei buollin čáskaduvvon ja buollinčáskadeaddjit báhce báikái ovtta gaskka fuolahit ahte ii buollá šat. Politiijat leat dutkagoahtán ášši.
Njálbmás almmái
Finnmárkku Politiija dieđiha Twittera bokte ahte vuossárgga veaigin ožžo dieđu ahte muhtin almmái lei muhtin Bossogohpegávppis njálmmušteamen.
Patrullja sáddejuvvui gávpái, muhto almmái lei guođđán buvdda ovdal go politiija joavddai dohko.
Politiija flávdastággu gahčai olbmo ala
Finnmárkku Politiija dieđiha Twittera bokte ahte vuossárgga gahčai flávdastággu mii lea olggobealde Kirkonjárgga politiijaviesu, muhtin olbmo ala.
Ambulánsa doalvvui olbmo dearvvašvuođaguovddážii iskan dihtii lea go roasmmehuvvan. Politiijat leat iskamin manin flávdastággu gahčai.
Dearvvašvuođaguovddážis dieđihit ahte olmmoš, gean ala flávdastággu gahčai, ii leat nu bahut roasmmehuvvan ja lea dássidis vuoimmis.
