Riikkabeivviid váljagottiid gullamat sámediggeláhkaevttohusas leat álgán. «Ii ruvkkiid Suoma Giehtaruohttasii» -joavku oaččui bovdehusa ekonomiijaváljagotti gullamii maŋŋebárgga 10.1.2023. Mii giitit vejolašvuođas beassat cealkit dehálaš áššis! Joavkku ovddastii gullamis Ellen Pautamo.
«Ii ruvkkiid Suoma Giehtaruohttasii» -joavkku áššedovdit dorjot sámediggeláhkaevttohusa ja ávžžuhit, ahte dat dohkkehuvvo.
Cealkámuš deattuhii evttohuvvon 9 paragráfa nappo ovttasdoaibman- ja ráđđádallangeatnegasvuođa, daningo dat lea nu dehálaš luonddu dáfus.
Láhkaevttohusas lea hui buorre dat, ahte ovttasbargu, rabasvuohta, ráđđádallan ja gulahallan lassánivčče. Sámiin ii leat Suomas go okta oktasaš, virggálaš ovddasteaddji. Lea dehálaš, ahte dainna ráđđádallojuvvo albmaláhkai ja ráđđádallamat dokumenterejuvvojit. Sámit galget beassat váikkuhit mearrádusaide.
Sámediggelága ođasmahttin lea ádjánan badjel logi jagi. Ođastusa galgá oažžut lohppii dál. Áddehallan ja duođalaš ovttasdoaibman ovdánit gulahallama bokte. Dain ávkašuvvet buohkat báikkálaččat ja olles riikkas.
«Ii ruvkkiid Suoma Giehtaruohttasii» -joavku čokkii jagis 2020 neahttaadreassa, man guottihedje badjel 37 000 vuolláičálli.
Cealkámuša leat vuolláičállán «Ii ruvkkiid Suoma Giehtaruohttasii» -joavkku áššedovdit Ellen Pautamo, Minna PE Näkkäläjärvi, Janne Hirvasvuopio, Pirita Näkkäläjärvi, Laura Olsen-Ljetoff, Maaren Palismaa ja Anni-Helena Ruotsala.
