Ruoŧa riikkajoavkku hoavddas lea korona, ja sii eai beasa gilvalit World Cup čierastallamiin Levis dán vahkkoloahpa. Sápmelaš Niiles Jouni Aikio áigu liikká rahpat iežas turistabáikki Levis várrugasat smávit turistajoavkkuide.
Lágideaddjit dieđihit ahte sii leat árvvoštallan lágideami ovttas Suoma eiseválddiin, ja ahte leat leamaš olu hástalusat dan earenomáš jagi. Levi World Cup lea ovttas Lapplándda buohcceviesuossodagain hábmen ollislaš dearvvašvuođa- ja sihkarvuođaplána maid rádjevávttat leat dohkkehan, ja mii lea dohkkehuvvon Suoma ráđđehusa njuolggadusaid vuođul. Maiddái Máhttodepartemeanta ja Suoma dearvvašvuođa doaimmahat leat dorjon mearrádusa lágidit doaluid, dieđihit lágideaddjit preassadieđáhusas.
– Doalut leat dehálaččat ja diibmá gehčče eanet go 250 miljovnna olbmo TV-sáddagiid, dieđihit Levi čierastallangilvvuid lágideaddjit Levi World Cup organisašuvnna preassadieđáhusas.
Korona duođaštuvvon
Bearjadaga bođii diehtu ahte Ruoŧa riikkajoavku lea ollen Levi muhto ahte sin hoavddas Christian Thomasis lea duođaštuvvon korona.
– Ruoŧa riikkajoavku lea biddjon erremii Levis go hoavddas lea duođaštuvvon korona ja dál eai beasa Ruoŧa čierastallit gilvalit vahkkoloahpa gilvvuin go Suoma eiseválddit leat mearridan dan, nu čállá NTB.
Koronadilli
Lágideaddjit barget olu praktihkalaččat vai eastadit njoammuma ja maid dárkkistit ahte buot gallededdjiin leat njálbmesuojit alde ja sii leat maid sirren olbmuid.
– Lágideapmi čađahuvvo koronaeastadannjuolggadusaid mielde, ja buot bileahtat vuvdojuvvojit neahta bakte. Go oastá bileahta doaluide, de čuvvot maid guokte njálbmesuoji mielde ja buot joavkkut nugo čierasteaddjit, mediabargit ja riikkajoavkkut leat sirrejuvvon fysalaččat, čilgejit lágideaddjit preassadieđáhusas
Áigu rahpat várrogasat
Badjeolbmos Niiles-Jouni Aikios lea iežas turistafitnodat Levis, «Saamen Kammi». Son lea ieš badjel 70-jahkásaš muhto áigu liikká rahpat iežas boradanbáikki «Saamen Kammi» smávit turistajoavkkuide dan World Cup vahkkoloahpa.
– Dál gal leat leamaš buot boradanbáikkit ja eanemus hoteallat gitta ja leat unnán turisttat dáppe. Mus lea maid gitta leamaš, muhto áiggun dál rahpat várrogasat go World Cup álgá Levis. De leat eanet olbmot dáppe, čilge son.
Juoigá turisttade
Aikio pláne váldit smávit turistajoavkkuid vuostá ja áigu juoigat maid turisttade nu movt láve. «Saamen Kammis» Levis sus leat golbma bargi ja son bargá maid ieš.
– Mii ráhkadit sámi borramuša ja de maŋŋel go guossit leat boradan, de mun juoiggan ja muitalan máidnasiid, čilge son. Dáppe ferte geavahit njálbmesuoji, nu ahte juoiggan maid njálbmesujiin. Gal dat manná bures go lea mikrofuvdna, čilge son.
Váruha koronadávddas
Niiles-Jouni čilge ahte son ii ieš duostta gal vuolgit geahččat «World Cup» čierastangilvvuid go nu olu olbmot čoahkkanit.
– In mun dohko gal duostta go dávda lea váralaš boarráset olbmuide. Muhto lágideaddjit ráddjejit gallis besset geahččat gilvvuid ja de galgá dollat gaskkaid nuppiide, nu lean mun goit gullan, čilge Aikio. Gal Suomas máhttet dieid koronadoaibmabijuid ja sávvamis manná bures, čilge son.
Njoammunvárra
Gihttela gielddadoavttir Heidi Tanninen čilge ahte lágidit World Cup doaluid koronaeastadannjuolggadusaid mielde.
– Doallat gaskkaid nuppiide lea deaŧalaš, ja maid ahte eai čoahkkan olu olbmot sisa dáluide. Boradanbáikkiin ferte geavahit njálbmesuoji, ja galgá maid lea guhkes gaska nuppiide.
Gihttela gielda ovttasbargá maid Pihlajalinna dearvvašvuođaguovddážiin ja sii váldet koronaiskosiid olles vahkkoloahpa, ja sis lea maid heahtenummir masa sáhttá riŋget jus leat korona dávdamearkkat.
– Dat lea eastadandihte njoammumiid, ja jus leat dávdamearkkat de ii dárbbaš mátkkoštit Gihttela dearvvašvuođaguovddážii váldit iskosa, čilge Tanninen. Lappi guovllus leat dieđihuvvon 67 korona njoammuma dan rádjái, dieđiha Suoma dearvvašvuođa doaimmahat THL.
Čađahit gilvvuid
Internationala čuoiganlihttu FIS čállá preassadieđáhusas ahte World Cup Levi čierastanluohkát leat dohkkehuvvon, ja leat hui buorit čierastanluohkát go váldet vuostá máilmmi čeahpimus čierastallit dán vahkkoloahpa.
– Mii leat ilolaččat go sáhttit dieđihit ahte vaikko leat leamaš olu hástalusat, váttis áiggit ja bivvalat, de mii sáhttit sihkkarit dadjat ahte leat gergosat gilvvohallamiidda. Suoma našuvnnalaš čuoiganlihttu ja Levi lágideaddjit leat dahkan vejolažžan lágidit gilvvuid, dajai FIS gilvohallanhoavda Peter Gerold preassadieđáhusas.
