SÁNAG lágida boahtte mánu seminára Oslos, mii lea heivehuvvon dearvvašvuođabargiide. Semináras galget oahppat movt deaivvadit sámi pasieanttaiguin, ja makkár kulturerohusat gávdnojit.
Sámi našuvnnalaš gealbobálvalus (SÁNAG) lágida boahtte mánu seminára Oslos ovttas Oslo ja Akershusa Fylkkamánniin, ja Gárrenmirkko gealboguovddážiin.
Seminára galgá ávkin dearvvašvuođabargiide, mat deaivvadit sápmelaččaiguin iežaset barggus. Sii besset gullat movt kultuvra ja historjá váikkuha gulahallama, pasieantta ja divššára gaskkas.
Álbmogiid erohusat
Semináras muitaluvvo earret eará movt sámi mánáid psyhkalaš dearvvašvuođa ovddida, movt kulturduogáš váikkuha traumadivššus, mo lea leahkit bonju-sápmelaš gávpogis ja movt de go loavkašuhttimat mannet buolvvas bulvii.
– Čálgosuorggi bargit fertejit diehtit makkár erohusat leat minoritehta ja majoritehta álbmogiin. Dan vai garvit boasttuipmárdusaid ja boasttudulkomiid, ja vai sáhttit buori divššu fállat, čállá Oslo ja Akershus Fylkkamánni iežaset neahttasiidui.
Sáhttá adnot eará oktavuođain maid
Seminára lea skábmamánu loahpas, ja bistá guokte beaivvi. Semináras besset guldaleaddjit gullat makkár árvvut, guottut, ja jurddašanmállet sápmelaččain leat, ja maid berrejit dovdat.
Erenoamážit go lea sáhka traumáhtalaš vásáhusain, maidda dárbbašit veahki.
Lágideaddjit dieđihit ahte seminára lea heivehuvvon sámi álbmogii, muhto sáhttá maid adnot ipmirdit eará álbmogiid mat eai leat oarje-máilmmi álbmogat.
