Meahciráđđehus ordne borgemánus sámegielat fuođđofáttarleairra Eanodagas. Leairras oahpásmuvvat guovllu lundui, sámekultuvrii, fuođđodikšunbargui ja dahkat oanehisfilmmat fuođđofáttáid birra.
Meahciráđđehus ordne borgemánus sámegielat fuođđofáttarleairra Eanodagas. Leairras oahpásmuvvat guovllu lundui, sámekultuvrii, fuođđodikšunbargui ja dahkat oanehisfilmmat fuođđofáttáid birra.
Fuođđofáttarleaira ordnejuvvo borgemánu 15.-17. beivviid.
– Leairras idjadat tealttáin ja lávuin ja málestat olgun, nuba mánát besset oahppat seammás ávkkálaš meahccedáidduid. Leaira lea oaivvilduvvon 7-12 -jahkásaččaide sámegielat mánáide. Buresboahtán leirii leat sámeguovllu ja maiddái sámeguovllu olggobeale mánát. Leairra áigge oahpásmuvvat bargobájiin earret eará fuođđodikšumii, dávgebissuin báhčimii ja luonddu ávkkástallamii suvdilis vugiin, čállá Pentti Pieski guhte lea sámegiela fuođđofáttarrávvejeaddji olles Suomas.
Besset oahppat filmmaid ráhkadit
Leairras mánát besset oahpásmuvvat maiddái ealligova dahkamii. Giehtačállit ja neaktit oanehisfilmmain, mat čájehuvvojit ovdamearkan Yle Sámi sámegielat Unna Junná -mánáidprográmmas. Leaira ordnejuvvo ovttasbarggus Sámi oahpahusguovddážiin, Yle Sámiin ja Eanodaga skuvllaiguin.
Sámegielat fuođđoleaira ollašuhttá Meahciráđđehusa fuođđobajásgeassima mihttomeriid lassin maiddái sámegiela ovddidandoaimmaid.
– Sámegielat dáhpáhusat leat eandalii dehálaš giellageavahandilálašvuođat mánáide ja dákkár leairras eará sámeguovlluid mánát besset oahpásmuvvat, gullat eará suopmaniid ja eará sámegielaid, Meahciráđđehusa sámegielat dieđiheaddji Pentti Pieski muitala.
(Ášši joatká gova vuolábealde)
Govva: Riikka Hurskainen
Leairra doaibma ordnejuvvo davvisámegillii ja leairras lea sadji 20 mánnái. Báikkit devdojuvvojit almmuhanortnega vuođul. Bealli leairra báikkiin lea várrejuvvon Eanodaga gieldda mánáide. Leaira lea nuvttá.
Almmuheapmi leirii álgá dál.
Leirii sáhttá almmuhit šleađgapoastta bokte ja das galgá almmuhit máná nama, agi ja fuolaheaddji oktavuođadieđuid.
Almmuheapmi lea čadni. Suoidnemánu loahpa maŋŋá biehttaleamis berrojuvvo 50 € máksu. Almmuheaddjiide sáddejuvvo maŋŋelis dárkilut almmuhanskovvi ja leairra prográmma.
– Buresboahtin Eanodahkii oahpásmuvvat meahccebivdui, sámekultuvrii ja ealligovaid dahkamii, čállá Pieski.
Almmuheamit ja lassedieđut:
Sámegielat dieđiheaddji Pentti Pieski, 040 7696 109, pentti.pieski(at)metsa.fi
Mii fuođđofáddariid?
Fuođđofáttar lea movttegis ja vásttolaš meahccebivdi dahje guollebivdi, gii háliida eaktodáhtolaš barggu bokte láidet mánáid ja nuoraid meahccebivdoáššiide. Mihttomearrin lea, ahte mánát ja nuorat roahkasmuvvet ja ohppet johttit luonddus, ohppet gudnejahttit ja dovdat luonddu ja ipmirdit suvdilis guollebivddu ja meahccebivddu mearkkašumi. Dát lihkostuvvá go fállat nuoraide ja mánáide vejolašvuođa deaivat vásihan meahccebivdi, gii láidesta sin fuođđoáššiide olgun doaimmalaš doaimmaid bokte. www.erakummi.fi
