Oslos galget dán sotnabeaivvi čájehit doarjaga «Standing Rock Sioux » čerdii, ja vuostehágu go Norga lea oasálaš ruhtademiid bokte oljobohcci huksemiidda, Amerihkas.
Oslos galget dán sotnabeaivvi čájehit doarjaga «Standing Rock Sioux » čerdii, ja vuostehágu go Norga lea oasálaš ruhtademiid bokte oljobohcci huksemiidda, Amerihkas.
Sotnabeaivvi leat Oslos miellačájeheamit gos sámi artisttat, olbmot ja searvvit ovttas luonddugáhttenservviin ja earáin dorjot «Standing Rock Sioux Tribe», Amerihkás.
Čalmmustahttet álbmoga
Norgga sámiid riikasearvvi jođiheaddji Beaska Niillas lea oassálasteme miellačájeheapmái ja lohká lea dáinna lágiin veahkeha eanet olbmuid dáppe Norggas oažžut dihtosii ášši birra ja mii dáhpáhuvvá doppe Amerihkas.
– Dákkár miellačájeheapmi lea vuogas vuohki čájehit ahte doarju sin rahčamiid ja eahpevuoiggalašvuođa maid vásihit, go ieš ii sáhte dohko vuolgit. Mii áigut čalmmustahttet ja muitalit olbmuide geat bohtet ja maid eiseválddiide, ášši birra, lohká son.
(Ášši joatká gova vuolábealde)
Gáibidit Norgga geassádit
Beaska muitala seammás miellačájeheamis čájehit vuostehágu go Norga lea oasálaš Dakota Access Pipeline huksemis iežas ruhtademiid bokte, DNB báŋku ja Oljofoanda bokte.
– Norga ferte geassádit huksenprošeavttas dakkaviđe ja eiseválddiid veahkaválddálašvuohta čáhcevárjaleddjiid vuostá ferte bissehuvvot.
Ášši duogáš
Beaska Niillas čilge oanehaččat ášši duogáža.
– Dakota Acces Pipeline oljofitnodat fitnodat áigu hukset oljobohcci mii manná njealji stáhta čađa Amerihkás, mii lea birrasiid 190 miilla, dahje seamma guhkki go Várggáin Osloi. Dákkár oljobohccit luoddanit ollesáigge, ja oljobohcci lea plánejuvvon mannat Missouri deanu vuoli. Jus doppe luoddana bohcci, de váikkuha dat 18 miljovnna olbmuid juhkančáhcái. Standing Rock Sioux čearda oaivvildit maid bohci áitit sin reserváhta bassi báikkiid.
Dáhttu gullat ášši birra
Norgga sámiid riikasearvvi jođiheaddji galgage boahtte vahkku deaivvadit sihke DNB ovddasteddjiiguin ja oljofoandda etihkkaráđiin.
– Lean leamaš juo oktavuođas singuin ja sis lea dáhttu gullat eanet ášši birra, ja maid mii oaivvildit. Mii gal sávvat ahte geavahit fámuideaset riekta dán áššis, lohká son.
Sávvet olusiid boahtit
Miellačájeheapmi lea sotnabeaivvi ja galgá leahkit Oslos operavistti alde. Beaska Niillas oaivvilda sápmelaččaide lea hui álki áddet ášši, go leat sullásaš áššit sámis.
– Midjiide lea hui álki govahallat movt dilli lea ja dan unohisvuođa maid amerihká eamiálbmogat vásihit juste dál. Muhto mii sávvat ollu olbmuid boahtit miellačájeheapmái, beroškeahttá leaš go sápmelaš vai ii, lohká Beaska Niillas.
Organisašuvnnat mat leat mielde miellačájeheamis leat Luondu ja Nuorra, Norgga sámiid riikasearvvi, Noereh, Luonddugáhttenlihttu, WWF, Sosialistalaš Nuorat ja Rukses Nuorat.
–
