Porsáŋggu musea lea lágidan kurssa johkafanasduddjomis. Mannan sotnabeaivvi luite dan vihtta johkafatnasa Leavnnjajohkii.
Porsáŋggu musea lea lágidan kurssa johkafanasduddjomis. Mannan sotnabeaivvi luite dan vihtta johkafatnasa Leavnnjajohkii.
RiddoDuottarMuseaid (RDM) – Porsáŋggu musea bovdii álbmoga fárrui go luite vihtta ođđa johkafatnasa Leavnnjajohkii mannan sotnabeaivvi, čakčamánu gávccát beaivvi.
– Mii leat hirbmat duđavaččat go birrasii 140 olbmo bohte min johkafanas luoitimii Patusuvantos, muitala Porsáŋggu musea jođiheaddji Riinakaisa Laitila.
Doalut ledje oassin 2018 Porsáŋgu kulturmuitobeivviin. Beaivvi prográmmas loahpahuvvui fanas luoitimin johkii. Álbmot beasai geahččalit goargŋut ja suhkat.
Seailluhit árbevieru
Lea RDM – Porsáŋggu musea mii lea lágidan johkafanasduddjonkurssa dán geasi ja oahpaheaddji lei fanasduojár Jouni Laiti.
RDM direktevra Anne May Olli muitala oahppit duddjojedje johkafatnasiid dološ málle mielde.
– Lea dehálaš ahte eanet olbmot máhttet duddjot árbevirolaš johkafatnasiid. Danin lea RDM lágidan dáid kurssaid ovttasráđiid earáiguin. Dáid kurssaid bokte leat mii maid ožžon duođaštuvvot mo duddjo fatnasiid árbevirolaččat, dasa gulli kultuvrra birra ja sánit mat gulle dasa, lohká RDM direktevra Anne May Olli.
Ovttasbargoguoimmit leat Bissojoga ja Leavnnja kveanasearvvit ja Porsáŋggu dáro-suoma searvi.
Dološ málle mielde
Fanasduddjonoahppit leat vielljaguovttos Dagfinn (64 jagi) ja Øyvind Lindbäck (55 jagi), Arne Gustav Sorgmunter ja Arnfin Kaaby.
– Lei hirbmat gelddolaš kursa. Dálvit vieččaimet badje-Leavnnjas beahceávdnasiid johkafatnasiidda, rákkuide, giellasiidda ja stávdnái, nu mo olbmot dolin dahke. Museafatnasa duddjuimet nu mo mu áddjá Robert Lindbäck ja Trygve Opdahl duddjuiga 1920-logus Skuvvanváris. Dán guovllus duddjojedje olbmot goargŋun-, buođđun- ja govddit gálvofatnasiid mainna goargŋut Vuolit Leavnnjajávrái ja das suhke guorpmi Bajit Leavnnjajávrái gitta Sáŋgojávrregoržái. Leavnnjajoga ii leat nu vuogas suhkat, buoret goargŋut ja nu lea fatnasiid maid duddjon, muitala Øyvind Lindbäck.
Seammás láittas dovdu
Øyvind Lindbäck muitala muhtin lea sus juo johkafatnasa tiŋgon.
Lohká 1978 sihkastii stáhta gonagaslaš mearrádusain báikeolbmuid fierbme- ja buođđovuoigatvuođa.
– Fáhkka ii gullon šat sáhka johkafatnasa, fierpmi ja buođđuma birra. Eai olbmot sáhtán šat dan birra hállat go eai beassan leat fatnasis oaggumin, muitala Øyvind Lindbäck.
Lohká fatnasat govdo bures, muhto lei seammás veaháš láittas go dát lei erenoamáš dáhpáhus ja álbmot maid dan dovddai.
