-Almmuhus-
OĐĐASATLágidit konferánssa mas fáddán lea sámi giella ja kultuvra

Lágidit konferánssa mas fáddán lea sámi giella ja kultuvra

-

-

Dán jagáš FeFo-konferánssa namma lea «NANNE/STYRK», ja konferánsa lea oaivvilduvvon buohkaide geat barget sámi áššii­guin.

– Ulbmil lea veahkehit lasihit dieđuid ja jurdagiid, mat sáhttet nannet konferánssa oassálastiid gealbbu ja jurddaávnnasvári. Mii diehtit ahte dát lea stuorra fáddá. Danne leat bovden Sámedikki ja Sámi allaskuvlla ovttasbargat iežaideametguin, dadjá FeFo gulahallan- ja servodatjođiheaddji, Robert Greiner preassadieđáhusas maid FeFo lea almmuhan.

 

Ovddasvástádus sámi kultuvrras

FeFo-konferánsa lágiduvvo Álttás skábmamánu 12. b. rájes skábmamánu 13. b. rádjai.

– Diibmá lágideimmet FeFo-­konferánssa vuosttas gearddi. ­Dalle ovttasbarggaimet Finn­márkku Vuovdeservviin. Sáhka dalle lei dálkkádatrievdamiin ja mis geat ássat Finnmárkkuopmodagas. Dán jagi ulbmiljoavkun leat sii geat barget sámi gielain ja ­kultuvrrain – juogo hálddahusas, akademiijas dahje giella-, ealáhus- dahje kulturbarggus. Dan mii ­dahkat dannego FeFos, finn­márkkulága ulbmila ja lága vuođuštusa mielde, lea earenoamáš ovddásvástádus sámi kultuvrras Finnmárkkus. Ja de háliidit láhkáseamet veahkehit čalmmustit 2019 ON-jahkin álgoálbmogiid gielaid várás, dadjá Greiner.

 

Eamiálbmotdutki logaldallá

Sáhkavuorrodolliid namat almmuhuvvojit dađistaga.

– Vuosttas gii lea lohpidan boahtit logaldallat, lea Hanne Veber. Son lea Københámmana universiteahta seniordutki, ja galgá earret eará muitalit maid son diehtá eamiolbmuin, geat leat fárren eret árbevirolaš servodagaineaset.

«Styrk» lea «nanne» dárogillii.

– Dáinna lágiin mii oktiigeassit maiddái iežamet konferánssa doaivvaáigumuša. Mii háliidit ahte mii ja buohkat earát, geat bargat sámi áššiiguin ja gažaldagaiguin, galgat máhccat ruoktot konfe­ránssas ain nannoset vuđđosiin bargat sámi giela ja kultuvrra buorrin, dadjá Greiner preassadieđáhusas.

-Almmuhus-