-Almmuhus-
-Almmuhus-
-Almmuhus-
OĐĐASATLágidit ipmilbálvalusa homofiillaide

Lágidit ipmilbálvalusa homofiillaide

-

-

Kárášjoga searvegotteráđđi lea mearridan ahte girku galgá doallat ipmilbálvalusa Sápmi Pride festivála oktavuođas. Searvegotteráđđi cealká ahte vurdet reakšuvnnaid.

Dán giđa lágiduvvo Sápmi Pride Kárášjogas, ja dan oktavuođas hástaledje sámi homofiillat, lesbat, bifiillat, trans-seksualálaččat ja queerat Kárášjoga girku lágidit ipmilbálvalusa sin várás. Ikte deaivvadii Kárášjoga searvegotteráđđi meannudit jearaldaga.

 

Sirdet Kárášjohkii

Kárášjoga searvegotteráđi jođiheaddji Mette Anti Gaup muitala ahte sii leat mearridan bovdet Sápmi Pride oassálasttii ipmilbálvalussii sotnabeaivvi miessemánu 31. beaivvi.

 – Mii mearrideimmet ahte ožžot searvat ipmilbálvalussii. Dien sotnabeaivvi lei galgat Šuoššjávrris ipmilbálvalus, muhto mii sirdit dan Kárášjoga girkui go sis lea hállu boahtit. Mii háliidit ahte buohkat geat atnet iežaset risttalažžan, dovdet iežaset buresboahtin girkui, lohká Anti Gaup.


Kárášjoga searvegotteráđi jođiheaddji Mette Anti Gaup. Priváhtagovva

Dorjot

Sápmi Pride prošeaktajođiheaddji Leammuid Lemet Ánde muitalii árat dán vahkkus ahte sidjiide lea girku dohkkeheapmi dehálaš. Kárášjoga searvegotteráđđi dáhtu buohkaid fátmmastit ja rahpá uvssaid Sápmi Pride festiválaoasseváldiide.

 – Mii eat oainne ahte eat galggašii doarjut sin, láhka han maid dadjá ahte ii galgga vealahit. Olbmot leat ovttaárvosaččat, čilge searvegotteráđi jođiheaddji Mette Anti Gaup.

 

Reakšuvnnat vuordimis

Olbmot geat eai leat heterofiillat vásihit dávjá olggušteami ja šaddet rahčat vai dohkkehuvvojit. Earret eará leat Norgga girkus leamaš garra digaštallamat go leamaš sáhka galget go homofiillat ja lesbat vihahuvvot girkus. Kárášjoga searvegotteráđđi jáhkká muhtimii reageret go lágidit ipmilbálvalusa Sápmi Pride oktavuođas.

 – Olbmuin leat iešguđetlágan oaivilat, nu ahte reakšuvnnat gal leat vuordimis. Jus leimmet nuppe láhkai vástidit, de livččii maiddái reakšuvnnat, loahpaha Anti Gaup.

-Almmuhus-