Bearjadaga ja lávvordaga, lágida Beassi fitnodat fas geassemárkaniid Kárášjogas.
Bearjadaga ja lávvordaga, lágida Beassi fitnodat fas geassemárkaniid Kárášjogas.
Beassi lágida geassemárkaniid Kárášjogas. Doppe gávnnat gávpemárkaniid ja lonuhusgávppi.
Sis lea oapmegálvomárkan ja lea maid lonuhusgávpi gos earáiguin sáhtát lonuhit gálvvuid. Beassi vuovdá káfe, váffeliid ja mállásiid.
Mannan vahkkoloahpa lágidii Beassi giđđamárkaniid gosa ledje boahtán ollu olbmot sihke vuovdit ja gávppašit, ja maid geahččat.
Eai lean dušše báikkálaš olbmot, muhto maiddái olbmot ránnjá giliin.
Ii heiven buohkaide
Go Beassi plánegođii giđđamárkaniid, de ledje ollu gálvovuovdit geat váillahedje nuppi vejolašvuođa.
Buohkaide geat háliidedje searvat, ii heiven mannan vahkkoloahpa searvat.
– Mannan vahkkoloahpa doalut eai heiven buohkaide, nu ahte mii fuobmáimet vel oktii dollestit sullii seammalágan doaluid. Min áigumuš dáiguin doaluiguin lea ahte olbmot besset vuovdit sin gálvvuid maidda leat ovdamearkka dihte dolkan. Soaitá leat nubbi gii dárbbaša juste dan biergasa masa don leat dolkan. De son beassá hálbái oastit geavahuvvon biergasa, muitala Beassi jođiheaddji Brita Kåven.
Hui ollu mánáidbiktasat
Olbmot buktet beavdeliinniid, láseliinniid, gohpuid ja lihtiid. Muhtin vuovdá vel áibbas ođđa biktasiid ja meahccedávviriid ge. Mánáidbiktasat ja stohkosat ja vel duodji ge lea gávdnamis.
– Muhtin olbmot čohkkejit dávviriid jagiid mielde, muhto de fuobmájit ahte sii eai dette dárbbaš daid dávviriid. De han lea ollu buoret vuovdit dahje jo lonuhit daid ovdal go bálkestit daid ruskalihttái. Nu ahte ovttaládje lea mis dá dakkár ruoná-doaibma. Measta jo birasgáhtten, dadjá Kåven.
Dáiddagávpečájáhus
Kárájohkalaš Ellen Brita Anti ja Čáhcesullo nisu Wenche Bauna leaba dál geargan nuppiin jagiin dáiddaskuvllas.
Soai doallaba dáiddačájáhusa «Min Davvin», ja čájáhus rahppo duorastaga diibmu 14.
Muđui lea čájálmas rabas juohke gaskavahku ja duorastaga suoidnemánu 26. beaivvi rádjái.
Ellen Britas leat guoktenuppelohkái gova ja Wenches fas leat vihtta-guhtta gova.
Soai leaba gávdnan inspirašuvnna luonddus ja ábis. Eanas Porsánggus gos Ellen Britas lea geasseorohat.
Sudno govat leat njuhttojuvvon oljjuin ja akrylain.
– Vaikko Porsángu ii leat nu guhkkin davvin, de lea dat goikke davvelis go mii, ja nu šaddá ge midjiide davvin. Danne lea ge čájáhusa namma maid «Min Davvin». Muitala Ellen Brita Anti.
– Bures boahtin buohkaide sihke geahččat, gávppašit, ja leahkit sosiála, loahpaha Brita Kåven.
