-Almmuhus-
KULTUVRALágidit Boine hit-eahkeda

Lágidit Boine hit-eahkeda

Neahttaredaktevra

-

-

Lávvardat eahkeda doallá Dimitri Joavku konseartta gos aivve lávlu Mari Boine lávlagiid, ja dát lea vuosttaš koara mii dan dahkká.

Dimitri Joavku lea mannan čavčča rájes hárjehallan Mari Boine lávlagiid ja lávvardaga leat gergosat doallat konseartta.

 – Mari Boine lea okta min stuorámus artisttain ja mis lei miella lávlut su lávlagiid. Danne lei ge hui stuorra gudni go Boine attii midjiide lobi dahkat dan, muitala Dimitri Joavkku gulahallanolmmoš Turid Vesterheim.

 

Vuosttaš koara

Dimitri Joavku ásahuvvui 1991:s ja lei doavttir Olaf Dimitri Røe guhte ásai Guovdageainnus guhte álggahii koara. Nu šattai ge korii namman Dimitri Joavku, dan rájes lea koara lávlun oalle viidát muhto eai goassege ovdal leat konsearttas lávlon aivve Mari Boine lávlagiid.

 – Mu dieđu mielde ii leat oktage eará koarra ge dahkan dan, ja mii lávlut lávlagiid maid Boine lea ráhkadan 80-logu rájes gitta dássážii, čilge Vesterheim.

Koaras leat birrasiid 15 miellahttu, ja čieža-gávccis dain leat leamaš koaras gitta álggu rájes, nu mo Vesterheim.

 

Heivehan lávlagiid

Konsearttas lávlot 11 lávlaga ja geahččit besset gullat Boine-šlágáriid dego «Alla hearrá guhkkin Oslos», «Gula gula» ja «Goaskinvielja».

Vaikke dirigeantaguovttos Inger Johanne Oskal ja Terje Aho leabage šaddan heivehit lávlagiid koarahápmái de dat eai leat rievdaduvvon.

 – Vuođđolávlla lea ain duohken, leat dušše lasihuvvon eanet jienat. Nu ahte buohkat dovdet gal daid lávlagiid go gullet daid, dadjá koara gulahallanolmmoš.

 

Lei mielas

Ovdal go koara hárjehallagođii Boine lávlagiid de fertejedje dieđusge jearrat lobi artisttas.

 – Son lei hui mielas dása ja suovai min lávlut su lávlagiid. Dađi bahábut lea Mari Boine ieš juste mátkkošteamen dál ii ge astta boahtit gullat min konseartta, muitala Vesterheim.

 

Konseartta čuojahit Guovdageainnu Thon Hoteallas lávvardaga cuoŋománu 18. beaivvi diibmu 21.

 – Mii sávvat buohkaide buresboahtima konsertii, dadjá Vesterheim.

 

 

-Almmuhus-