Kárášjoga giehtaduodjesearvi lágida bivttasdivvun-eahkeda Kárášjogas boahtte vahkku.
Guokte eahkeda maŋŋálaga áigu giehtaduodjesearvi čohkket olbmuid duodjeeahkedii mas ulbmil lea eastadit ahte biktasat, maid sáhttá divvut ja ain atnit, bálkestuvvojit.
– Dáppe sáhtát oažžut veahki divvut billahuvvan ja gollan biktasiid. Mis lea rabas buohkaide beroškeahttá man olu máhtát divvuma ja duddjoma birra ovdalaččas, ja giehtaduodjesearvi rávve, bagadallá ja mis leat divvunreaiddut, čállá searvi preassadieđáhusas.
Divvuneahket lea nuvttá buohkaide ja searvi guossoha gáfe ja gáhkuid sidjiide geat bohtet duddjot dan eahkeda.
