Snelandia bidjá sierra busseruvtto gaskal Álttá ja Guovdageainnu beassážiid.
Beassážiid leat ollu doaimmat Guovdageainnus, jahkásaš beassášfestivála ja eará árbevirolaš doaimmat.
Dárbu bussii
Danin ordnejuvvo dát beassášruvtto, muitala kultuvrra, álbmotdearvvašvuođa ja johtalusa váldolávdegoddejođiheaddji Geir Ove Bakken Finnmárkku fylkkagieldda preassadieđáhusas.
– Oktasaš fievrrideami doaibmaprográmmas lea okta čuokkis mii dadjá ahte busset galget vuodjit go lea dárbu, ja beassážiid gal vissásit lea dárbu bussii mii vuolgá Guovdageainnus ja bussii mii manná Guovdageidnui, dadjá Bakken.
Buorre gulahallan
Buorre gulahallan dagahii ahte sii ožžo busseruvttuid doibmii beassážiidda.
– Buori gulahallamiin Guovdageainnu suohkaniin leat dál busseruvttot sajis, ja buoremus lági mielde heivehuvvon sin ruovttoluottadieđuid mielde, loahpaha son.
