Odne, njukčamánu 16.beaivvi, lea kvenabeaivi, ja fylkkaráđis leat dearvvuođat álbmogii vaikko eai šatta ávvudeamit nu go ledje jurddašuvvon.
– Kvenaleavga gesso leavgastággui čájehan dihte makkár sadji kvena kultuvrras lea min guovllus, lohká plána, ekonomiija ja kultuvrra fylkkaráđđi Anne Toril Eriksen Balto preassadieđáhusas man Romssa ja Finnmárkku fylkkasuohkan lea sádden mánnodaga.
– Dađi bahábut eat beasa ávvudit beaivvi nu go leimmet plánen, koronavirusa dihte. Mii čalmmustahttit dattetge dán beaivvi jurddašemiin dan positiiva ovdáneami mii kvena gielas ja kultuvrras lea, ja maid sáhttit dahkat vai nannet ovdáneami.
Dehálaš bargu
Fylkkaráđđi lohká kvenaid ja norggasuopmelaččaid guhkit áiggi leamaš dehálaččat báikkálaččat, muhto eai leat nu bures dohkkehuvvon. Kvenabirrasiin leat máŋga jagi bargan doalahit ja nannet gielaset.
– Bargu nannet áitojuvvon giela ja kultuvrra lea proseassa mii ádjána, go giella- ja kulturguovddážat ovttas doaimmalaš eaktodáhtolaš birrasiin ja profeššunealla fealttas dahket hirbmat buori barggu. Dat bargu lea dehálaš go oahpaha kvenakultuvrra, historjjá ja árbevieruid, muhto maiddái go sihkkarastá kultuvrra ja giela boahtteáiggi, lohká fylkkaráđđi Eriksen Balto.
Politihkalaš vuođđu
Romssa ja Finnmárkku fylkkasuohkan dieđiha ahte áigot barggu bokte heivehit vai giella ja kultuvra ealáskahttojuvvo ja ovdána.
– Fylkkaráđđi lea politihkalaš vuođus bidjan olu saji sámi ja kvena vuoruhemiide. Lea dehálaš signála ja dohkkeheapmi makkár kvenaid ja norggasuopmelaččaid kultuvrra mearkkašupmi lea leamaš ja ain lea min guovllus. Lea maid čalmmustahttin ahte kvena giella- ja kulturgelbbolašvuohta lea dehálaš ja áigeguovdil boahtteáigái, dadjá Eriksen Balto preassadieđáhusas ja loahpaha sániiguin:
– Hyvää kväänikansan päivää! (Sámegillii: Lihkku beivviin!).
