-Almmuhus-
Featured box1 Kurt (14) ilus maŋŋel Arctic Winter Swim

Kurt (14) ilus maŋŋel Arctic Winter Swim

-

-

Nuorra vuoddji oaččui buriid bohtosiid biirečoagganeamis.

Kárášjoga vuodjansearvi lágidii mannan vahkkoloahpa biirečoagganeami vuodjamis Arctic Winter Swim. Gilvvuide serve váile 200 vuoddji, ja okta sis lei kárášjohkalaš Kurt Mortelmans Somby. Vaikko lea dušše 14 jagi, de lea juo golbma jagi gilvvohallan. Vahkkoloahpa gilvvuin vásihii ahte nagodii časkit measta buot iežas ovddeš olahusaid.

– Measta buot olahin. Ožžon maid «bestemannspremien», ja vuiten golli buot mas individuella vudjen, muitala Somby.

OASSÁLASTTIT: Kurt Mortelmans Somby ja Ivar Áigin Dalseng vuodjaba Kárášjoga vuodjansearvvi ovddas.
OASSÁLASTTIT: Kurt Mortelmans Somby ja Ivar Áigin Dalseng vuodjaba Kárášjoga vuodjansearvvi ovddas.

Vuordámušat

Sus ledje stuora vuordámušat ovdal gilvvuid, ja lea ilus go nagodii ná bures.

– Dat manai hui bures. Dat lea hui somá go beassá earáid vuostá vuodjat, muitala Somby.

50 jagi ávvudeapmi

Nina Charlotte Olsen lea Kárášjoga vuodjansearvvi jođiheaddji, ja lea duhtavaš go buot manai nu movt galggai.
Nina Charlotte Olsen lea Kárášjoga vuodjansearvvi jođiheaddji, ja lea duhtavaš go buot manai nu movt galggai.

Kárášjoga vuodjansearvvi jođiheaddji Nina Charlotte Olsen lea duđavaš doaluiguin, mat ledje vuodjansearvvi 50-jagi ávvudeami oktavuođas maiddái.

– Dat lea hui hearvái go ná máŋggas serve. Mis ledje 19 searvvi mielde, ja maid Malene Rypestøl riikkajoavkkus bođii, gii leat stuora ovdagovvan máŋgasiidda, muitala Olsen. 

Olsen muitala ahte doaluid eai livčče sáhttán čađahit jus eai livčče eaktodáhtolaš veahkit, ja rámida buohkaid geat veahkehedje.

– Buot lea mannan nu njuovžilit, ja mis lea nu somás vahkkoloahppa leamaš, dadjá Olsen.

Ovdáneapmi

Kurt Mortelmans Somby mielas lei earálágan vásáhus beassat searvat gilvvuide gos ná ollu vuoddjit, ja rámida searvvi go oažžu dákkár vejolašvuođaid.

– Mis lea hui buorre hárjeheaddji, gii lea hui čeahppi. Mii oažžut ollu vejolašvuođaid ovdánit vuodjamis, dadjá Somby gii hárjehallá čieža vuodjanvuogi čieža geardde vahkus ja vel vuoimmi guovtte geardde vahkkus.

Viidáset

Dál lea juo hárjehallame jahkeklássačoahkkaneapmái, mii lea guovtti vahkku geahčen Girkonjárggas.

– Jus vuoitá das, de beassá viidáseappot jahkeklássameašttirgilvvuide Osloi. Dat livčče hui somá, muitala Somby.

- Advertisement -
-Almmuhus-