-Almmuhus-
-Almmuhus-
-Almmuhus-
KULTUVRAKursa vuođul ráhkaduvvon čájáhus

Kursa vuođul ráhkaduvvon čájáhus

-

-

RiddoDuottarMuseat-Sámiid Vuorká-Dávvirat leat dál ráhkadan čájáhusa fanasduddjonkurssa lágideami dieđuid vuođul.

RiddoDuottarMuseat-Sámiid Vuorká-Dávvirat bovdejit «Johkafanas» čájáhussii man musea lea ráhkadan dieđuid vuođul maid čohkkii fanasduddjonkurssa lágideami olis, áigodagas 04.07.-09.09.2016 Kárášjogas.

 

Olu mávssolaš dieđut
Kurssas duddjojedje guhtta oasseváldi johkafatnasiid, ja musea čohkkii olu mávssolaš dieđuid fanasduddjomis, maiddái čohkkejuvvojedje sullii 550 sámegiel doahpaga mat leat guoskevaččat johkafatnasiidda, ja 14 olbmo leat muitalan fanasgeavaheamis.

Sii leat Sirpmá rájes, gitta Čoavddatmohkkái, Anárjohkii ja Kárášjohkii badjin.

Čájáhusas leat guhtta johkafatnasa, čállosat, govat ja fanasduddjonfilbma mii filbmejuvvui kurssas.

 

Čađahuvvui sámegillii
Kurssas duddjojedje oasseváldit guhtta iešguđetlágan johkafatnasa.

Oahppit besse duddjot johkafatnasiid mat leat leamaš geavahusas ja mat ain geavahuvvojit Deanu-čázádaga bajágeahčin ja oalgejogain Kárášjoga guovllus.

Kursa čađahuvvui sámegillii ja oahpahuvvojedje duddjonvuogit, mo ávnnastit, fanasmállet iešguđet čázádagain, sámegiel namahusat ja doahpagat, fanasduddjoma estehtalaš bealit ja mo fanasgeavaheapmi lea rievdan ovddeš áiggis dálážii.

Fanasduddjonkursa čađahemiin lea musea buori muddui olahan fanasprošeavtta mihtu, mii lea vurket ja seailluhit sámi johkafanasárbevieruid ja maiddái dan immatriealla kulturárbeoasi.
Prošeavtta ruhtadeaddjit leat Sámediggi, Norgga Kulturráđđi, Unesco ja RiddoDuottarMuseat.

-Almmuhus-