Sámiráđđi lágida ovttas Sámedikkiin norggabeale ja Innuvašuvdna Norggain KulturSápmi konferánssa digitála hámis.
KulturSápmi lea jahkásaš gávnnadanbáiki Sámi dáidda- ja kultursuorgái Sámis, ja lágiduvvui vuosttáš háve Gironis jagi 2019. Koronapandemiija geažil dán jagaš KulturSápmi lágiduvvo digitála hámis, ja konferánssas beassat gullat makkár ođđa dáidda- ja kulturprošeavttat leat jođus sámis, ja oasálastit ságastallamiidda kultursuorggi vejolašvuođaid ja hástalusaid hárrái.
– Mii leat nu rápmásat go beassat almmuhit dán jagaš prográmma, gos sámi artisttat ja dáiddárat nugo Sofia Jannok, Joar Nango, Roman Yakolev, Hildá Länsman, Emil Karlsen ja ollu earát váldet oasi. VALY jietna- ja čuovgafitnodat barget veahkkin sihkkarastit buori kvalitehta konferánssas, dadjá Christina Hætta, Sámiráđi kulturossodaga jođiheaddji.
Váldoulbmil
KulturSápmi konferánssa váldoulbmil lea fállat sámi kultursuorgái gávnnadanbáikki gos besset fierpmádagaid hukset riikkarájáid rastá ja movttiidahttit eambbo ovttasbargui.
– Mus lea doaivva ahte mii nagodit láhčit buori deaivvadanbáikki váikko KulturSápmi lágiduvvo dán jagi digitála hámis, dadjá Hætta.
Rájárasttildeaddji hástalusat
Prográmmas leat maiddái «gievkkanbeavdeságastallamat» gos besset digaštallat hástalusaid mat erenomážit váikkuhit sámi dáidda- ja kultursuorgái. – Movt váikkuha koronapandemiija sámi kultursuorgái Ruošša bealde Sámis, ja makkár doaibmabijuid berre čađahit? Leat go nášunala ja sámi kulturdoarjjaortnegat doarvái heivehuvvon sámi kultursuorggi dárbbuide ja movt sáhttit buoridit min doarjjaortnegiid? Dát leat dušše muhtin gažaldagain maid sávvat digaštallat, dadjá Hætta.
Konferánsa lágiduvvo digitálalaččat, ja dasa galgá dieđihit ovdagihtii. Konferánssas lea vejolaš geavahit sihke davvisámegiela, ruoŧa/dárogiela, eŋgelasgiela ja ruoššagiela, go sii dulkojit buot daid gielaide.
